Куба ҳуқуқ-тартибот органлари Украинадаги урушда Россия томонидан қатнашиш учун Куба фуқароларини ёллашда иштирок этганликда гумонланган 17 киши ҳибсга олинганини маълум қилди. Бу ҳақда Reuters хабар берди.
Куба Ички ишлар вазирлиги матбуот котиби Сезар Родригеснинг телевидениеда айтишича, ҳибсга олинганлар орасида жиноий тармоқ ташкилотчиси ҳам бор.
Родригес тергов тафсилотлари ва ҳибсга олинганларнинг исм-шарифларини ошкор қилмади, фақат ИИВ маълумотларига кўра, жиноий тармоқ раҳбари икки маҳаллий аҳолининг бевосита кўмагида ҳаракат қилганини айтди.
Прокурор Хосе Луис Рейес Куба фуқароларини урушга ёллаш ишига алоқадор шахслар жиноятнинг оғирлигига қараб 30 йилгача қамоқ, умрбод қамоқ ёки ўлим жазосига ҳукм этилишини айтди. Ҳибсга олинганлар одам савдоси, ёллаш ва хорижий давлатга қарши душманлик ҳаракатларида айбланмоқда.
Кубада урушга ёллайдиган жиноий тармоқ фош бўлди
5 сентябрь куни Куба Ташқи ишлар вазирлиги одам савдосининг жиноий тармоғи аниқланганини эълон қилди, унинг иштирокчилари Куба фуқароларини Украинадаги урушда Россия томонида қатнашиш учун ёллаган. Баёнотда айтилишича, жиноий тармоқ иштирокчилари Россияда яшовчи Куба фуқароларини ва “ҳатто Кубада яшовчи” айрим кишиларни Украинадаги “ҳарбий амалиётларда” иштирок этаётган Россия Қуролли кучлари сафига жалб қилишга уринган. Куба ТИВ хабарига кўра, бундай уринишлар зарарсизлантирилиб, ушбу ҳаракатларга алоқадор шахсларга нисбатан жиноий иш қўзғатилган.
Сентябрь ойи бошида Буюк Британия Мудофаа вазирлиги ўзининг кундалик шарҳида Россия ҳукумати Украинадаги урушда қатнашиш учун чет эл фуқароларини, биринчи навбатда, Россия билан қўшни давлатлардан фуқароларни жалб қилиш орқали Қуролли кучлар сафини тўлдиришга уринаётганини айтганди.
Россияда Украинага кенг кўламли босқин бошланганидан кўп ўтмай, армияда хизмат қилиш учун шартнома имзолаган хорижликларнинг фуқаролик олишини осонлаштирувчи қонунлар қабул қилинди.
Изоҳ (0)