Украина президенти Владимир Зеленский Кремлни “Вагнер” асосчиси Евгений Пригожиннинг ўлимида айбдор деб ҳисоблаганлар сафига қўшилди. Бу ҳақда BBC хабар берди.
“Путин одам сифатида ҳам, сиёсатчи сифатида ҳам бўшашди. У Пригожинни ўлдирди — ҳар эҳтимолга қарши, бизда шундай маълумотлар бор. Пригожин вафоти сабабли Украинада мотам кунлари бўлмади. Биз учун бу битта террорчига камайишдир”, — деди Украина президенти.
Зеленский русларнинг руҳияти пасайиб кетгани, чунки улар “вагнерчи”лар орқасида яшириниб, ёлланма аскарларни жанг майдонига ташлашга одатланганини айтди. Украина президенти Путин “Вагнер” асосчисининг ўлимига алоқадор бўлиши мумкинлиги ҳақидаги хулосага қандай маълумотлар асосида келганига аниқлик киритмади.
Аввалроқ Оқ уй ҳам Россия раҳбарияти “Вагнер” раҳбарининг ўлимига алоқадорлиги ҳақида даъво қилганди.
“Барчамиз биламизки, Кремль ўз рақибларини ўлдириш одати бор. Нима бўлгани аниқ”, — деган Оқ уй матбуот котиби Карин Жан-Пьер.
АҚШ президенти Жо Байден ҳам ушбу ҳодисада Россия президентининг роли бўлиши мумкинлигини айтганди.
“Нима бўлганини аниқ билмайман. Лекин ҳайрон эмасман. Россияда ортида Путин турмаган ишлар камдан кам бўлади. Жавоб бериш учун менда етарли маълумот йўқ”, — деган у.
Кейинроқ Байден АҚШ Пригожин учаётган самолётнинг ҳалокатга учраганини аниқлашга интилаётганини таъкидлади.
Пригожин авиаҳалокати
Евгений Пригожин 23 август куни Москвадан Санкт-Петербургга учаётган шахсий самолёти Тверь вилоятида қулаши оқибатида ҳалок бўлди.
У билан бирга унинг “Вагнер”даги сафдошлари ҳам ўлди. Самолёт ҳалокатига айнан нима сабаб бўлгани ҳақида турли хил версиялар мавжуд: бортдаги портлашдан тортиб ракета ҳужумигача.
Пригожиннинг дафн маросими 29 август куни “ёпиқ форматда” Санкт-Петербургдаги “Пороховскоэ” қабристонида бўлиб ўтди. Видолашув маросимида 30 нафаргача одам иштирок этди, фақат яқинлар ва қариндошлари. “Вагнер” раҳбари отасининг қабри ёнига дафн этилган.
Изоҳ (0)