Гонконг 1884 йилдан буён кузатилмаган энг кучли ёғингарчилик остида қолди. Шаҳарда бўронли об-ҳавонинг “қора” — энг юқори даражасидаги огоҳлантириш эълон қилинди. Кўчаларни сув босди, жамоат транспорти ҳаракати тўхтатилди. South China Morning Post хабарига кўра, ёмғир қўшни Шэньчжэнга ҳам таъсир қилган.
Экстремал об-ҳаво шароити туфайли 110 киши тан жароҳати олди, улардан тўрт нафарининг аҳволи оғир: икки нафари бахтсиз ҳодисада, қолганлари эса ерга йиқилиб жароҳатланган. Ёмғир пайтида сув тўплайдиган ҳовузга тушиб кетган бир киши бедарак йўқолган. Яна икки киши ҳалок бўлган.
Гонконг фонд биржаси ва HKЕХ клиринг компанияси об-ҳаво шароити туфайли савдо сессияларини бекор қилди.
“Қимматли қоғозлар ва деривативлар бозорларида бугунги қора бўрон ҳақида огоҳлантириш ва экстремал шароитлар туфайли ҳеч қандай савдо бўлмайди”, — дейилади биржа веб-сайтида.
Аввалроқ биржа раҳбарияти кунлик сессия об-ҳаво шароитига боғлиқ бўлишини таъкидлаб, эрталабки савдоларни бекор қилганди.
Кучли тошқинлар ва ёмон об-ҳаво шароити туфайли Гонконг метеорология обсерваторияси аҳолига “вақтинчалик бошпана сифатида хавфсиз жойларда қолишни” тавсия қилди. 8 сентябрь куни эрталаб энг юқори даражадаги “қора” бўрон ҳақида огоҳлантириш етти соатдан кўпроқ вақт амал қилиши айтилди, бу рекорд муддат бўлиб, охирги марта 1999 йил 23 августда ўрнатилган шундай огоҳлантириш 5 соат 47 дақиқа давом этган.
Хитой жанубидаги Гуандун провинциясида ҳам рекорд даражадаги ёғингарчилик кузатилди. Шэньчжэнда ёғингарчиликнинг интенсивлиги бутун метеорологик кузатувлар даврида тарихий максимал даражадан ошиб кетди, метро қисман сув остида қолди. Гуанчжоу метеорология обсерваторияси маълумотларига кўра, мегаполис жорий йилнинг энг кучли бўронини бошдан кечирмоқда.
Гонконгда аҳолини кучли ёмғир ҳақида огоҳлантириш учун уч даражали тизим қўлланади. Сариқ даража ёмғирнинг интенсивлиги 30 мм/соатдан, қизил даража эса 50 мм/соатдан ошишини кўрсатади. Бўрон ҳақида огоҳлантиришнинг энг юқори “қора” даражаси ёмғир интенсивлиги 70 мм/соат бўлганида эълон қилинади.
Изоҳ (0)