Kuba huquq-tartibot organlari Ukrainadagi urushda Rossiya tomonidan qatnashish uchun Kuba fuqarolarini yollashda ishtirok etganlikda gumonlangan 17 kishi hibsga olinganini ma’lum qildi. Bu haqda Reuters xabar berdi.
Kuba Ichki ishlar vazirligi matbuot kotibi Sezar Rodrigesning televideniyeda aytishicha, hibsga olinganlar orasida jinoiy tarmoq tashkilotchisi ham bor.
Rodriges tergov tafsilotlari va hibsga olinganlarning ism-shariflarini oshkor qilmadi, faqat IIV maʼlumotlariga ko‘ra, jinoiy tarmoq rahbari ikki mahalliy aholining bevosita ko‘magida harakat qilganini aytdi.
Prokuror Xose Luis Reyes Kuba fuqarolarini urushga yollash ishiga aloqador shaxslar jinoyatning og‘irligiga qarab 30 yilgacha qamoq, umrbod qamoq yoki o‘lim jazosiga hukm etilishini aytdi. Hibsga olinganlar odam savdosi, yollash va xorijiy davlatga qarshi dushmanlik harakatlarida ayblanmoqda.
Kubada urushga yollaydigan jinoiy tarmoq fosh bo‘ldi
5-sentabr kuni Kuba Tashqi ishlar vazirligi odam savdosining jinoiy tarmog‘i aniqlanganini e’lon qildi, uning ishtirokchilari Kuba fuqarolarini Ukrainadagi urushda Rossiya tomonida qatnashish uchun yollagan. Bayonotda aytilishicha, jinoiy tarmoq ishtirokchilari Rossiyada yashovchi Kuba fuqarolarini va “hatto Kubada yashovchi” ayrim kishilarni Ukrainadagi “harbiy amaliyotlarda” ishtirok etayotgan Rossiya Qurolli kuchlari safiga jalb qilishga uringan. Kuba TIV xabariga ko‘ra, bunday urinishlar zararsizlantirilib, ushbu harakatlarga aloqador shaxslarga nisbatan jinoiy ish qo‘zg‘atilgan.
Sentabr oyi boshida Buyuk Britaniya Mudofaa vazirligi o‘zining kundalik sharhida Rossiya hukumati Ukrainadagi urushda qatnashish uchun chet el fuqarolarini, birinchi navbatda, Rossiya bilan qo‘shni davlatlardan fuqarolarni jalb qilish orqali Qurolli kuchlar safini to‘ldirishga urinayotganini aytgandi.
Rossiyada Ukrainaga keng ko‘lamli bosqin boshlanganidan ko‘p o‘tmay, armiyada xizmat qilish uchun shartnoma imzolagan xorijliklarning fuqarolik olishini osonlashtiruvchi qonunlar qabul qilindi.
Izoh (0)