Украина фақат ҳарбий харажатларни бюджетдан ўзи қоплай олади, қолган ҳамма соҳалар Киев ҳамкорлари томонидан ажратилган маблағлар ҳисобидан молиялаштирилади. Бу ҳақда мамлакат молия вазири Сергей Марченко маълум қилди.
“Биз хавфсизлик ва мудофаа соҳасини ўз кучимиз билан қоплаяпмиз. Бошқа барча харажатларни, таъкидлайман, бошқа барча харажатларни ҳамкорларимиз ҳисобидан, хориждан оладиган маблағлар ҳисобидан молиялаштирамиз”, — деди у.
Вазирнинг қўшимча қилишича, мамлакат ичидаги барча солиқ ва йиғимлар ҳарбий харажатларга йўналтирилган.
“Бу маблағ етарли эмас, шунинг учун биз фарқни ички кредитлар ва ҳарбий облигациялар ҳисобидан қоплаймиз”, деди молия вазири.
Украинанинг 2023 йилги бюджети рекорд даражадаги 38 миллиард доллар дефицитга эга. Президент Владимир Зеленский Ғарб Киевга бюджет камомадини қоплашда ёрдам беришига умид билдирди. Июль ойида Украина бош вазири Денис Шмигал халқаро ҳамкорлар йил бошидан буён Киевга бюджет тақчиллигини молиялаштириш учун 23 миллиард доллардан ортиқ маблағ ажратганини маълум қилган эди.
Изоҳ (0)