Украина ташқи ишлар вазири Дмитрий Кулеба истеъфога чиқиши мумкин. Зеленский офисида 42 ёшли дипломатга нисбатан ишонч пасайди. Бу ҳақда zn.ua хабар берди.
Украина президенти Владимир Зеленский Кулебага хайрихоҳ бўлса-да, элчиларни тайинлаш ва ташқи сиёсатга оид қарорлар қабул қилишда ташқи ишлар вазирининг таъсири пасайгани айтилмоқда.
Эътиборлиси, Украинанинг йигирмага яқин элчихоналари, жумладан, Бельгия, Буюк Британия ва Венгриядаги элчихоналар раҳбариятсиз қолганига қарамай, Зеленский вазирнинг элчи лавозимларига таклифларини рад этмоқда ёки уларни тайинлашни кечиктирмоқда.
“Ташқи ишлар вазири таъсирининг пасайишига Украина президенти офиси раҳбари Андрей Ермак Кулебани нафақат ташқи сиёсатда, балки Зеленскийга маълумот етказиб беришда ҳам рақобатчи сифатида қараши сабаб бўлди”, — дейилади хабарда.
Кулеба ўрнини Украина президенти офиси раҳбари ўринбосари Андрей Сибига эгаллаши мумкин. Муқобил номзодлар орасида парламент ташқи сиёсат ва парламентлараро ҳамкорлик қўмитаси раиси Александр Мережко ҳам бор.
“Мережконинг Ташқи ишлар вазирлигига янги раҳбар этиб тайинланиши президентнинг дипломатик хизматга ишончсизлиги давом этаётганини кўрсатади, бироқ у Ермакка содиқлик билан жуда мос келади”, — деб таъкидлади газета кузатувчиси.
Изоҳ (0)