Хитой яримўтказгичларни ишлаб чиқаришга сармоя киритадиган, давлат томонидан қўллаб-қувватланадиган янги инвестиция фондини ишга туширишни режалаштирмоқда. Бу ҳақда Reuters манбаларга таяниб хабар берди.
Жамғарма орқали кутилаётган жами сармоя 300 миллиард юанни (41 миллиард доллар) ташкил этади.
Янги фонд яқин бир неча ой ичида Хитой расмийларидан якуний рухсат олиши кутилмоқда.
Хитой яримўтказгичлар ишлаб чиқаришга катта пул сарфламоқда, чунки АҚШ ва унинг баъзи иттифоқчилари Хитойнинг янги авлод чипларини яратиш имкониятларини чеклаш учун кескин чоралар кўрмоқда.
Хусусан, АҚШ Хитойга бунинг учун зарур бўлган технология ва асбоб-ускуналарни олиб киришга қаршилик кўрсатишга интилмоқда. Аввалроқ Хитой июнь ва июль ойларида бундай ускуналар импортини кескин оширгани хабар қилинган эди. Reuters хабарига кўра, янги жамғарма маблағларининг бир қисми айнан чиплар ишлаб чиқариш учун ускуналар тайёрлашни ривожлантиришга йўналтирилади.
Reuters манбаларига кўра, Хитой Молия вазирлиги янги фондга 60 миллиард юан (8,2 миллиард доллар) сармоя киритмоқчи, яна қайси ташкилотлар жамғармага сармоя киритиши ҳозирча маълум эмас.
Изоҳ (0)