“Қозоғистон армияси чақириқларга тайёр туриши керак” — Тўқаев  (фото) 

Қозоғистон президенти Қосим-Жўмарт Тўқаев ҳарбий хизматчилар билан мулоқотда армияни чақириққа тайёр туришга чақирди. Бу ҳақда Akorda хабар берди.

Тўқаев “Батил тойтарис-2023” ҳарбий машғулотларидан сўнг Олмаота вилоятида ҳарбий хизматчилар билан учрашди. У мураккаб геосиёсий вазиятда бундай ҳарбий машғулотларни ўтказиш муҳимлигини таъкидлади.

“Бугунги кунда жаҳон мудофаа тизимида кенг кўламли ўзгаришлар рўй бермоқда. Урушнинг замонавий услублари, айниқса, гибрид турлари кенг тарқалмоқда. Ҳужумлар нафақат ҳарбий, балки ахборот, психологик, сиёсий, иқтисодий ҳам бўлиши мумкин. Шунинг учун Қозоғистон Қуролли кучлари ҳар қандай чақириқларга тайёр туриши керак.

Бу замонавий профессионал армияга қўйиладиган асосий талаб. Бизнинг ягона ватанимиз — Қозоғистон! Ватанимиз, еримиз ва фуқароларимиз хавфсизлиги ва ҳимоясини таъминлаш умумий муқаддас бурчимиздир”, — деди Тўқаев.

У армия энг мураккаб жанговар топшириқларни бажаришга шай бўлиши кераклигини таъкидлади.

“Бунинг учун уни юқори технологияли қуроллар ва юқори сифатли ҳарбий техника, ўқ-дорилар билан тўлиқ таъминлаш принципиал аҳамиятга эга. Зирҳли машиналар, дронлар, замонавий ўқотар қуроллар — буларнинг барчасини мамлакатимизда ишлаб чиқаришимиз мумкин ва керак.

Умуман олганда, ҳарбий-саноат мажмуаси армиямизнинг жанговар қобилияти учун ишончли пойдевор бўлиши керак”, — деди Қозоғистон президенти.

Шунингдек, сиёсатчи ҳарбий дала ошхонасида аскарлар билан овқатланиб, улар билан суҳбатлашди.