Қозоғистон президенти Қосим-Жўмарт Тўқаев республикага давлат ташрифи билан келган германиялик ҳамкасби Франк-Валтер Штайнмаер билан қўшма матбуот анжуманида Украинада ўт очишнинг тўхтатилишга умид билдирди ва бунга эришиш учун Остона қўлидан келганча ҳисса қўшишга тайёрлигини айтди. Бу ҳақда Тўқаев матбуот хизматининг Telegram-каналида хабар берилди.
Журналистлар билан учрашувда Қозоғистон раҳбари Украина атрофидаги вазият бўйича республика позициясини яна бир бор баён қилган.
“Биринчидан, биз Бирлашган Миллатлар Ташкилоти низомига қатъий риоя қилишимиз ва умуман олганда, албатта, БМТни дунёда бўлинмас ва универсал ташкилот сифатида қўллаб-қувватлашимиз керак. Иккинчидан, биз ҳам Хитой ва бошқа давлатлар томонидан билдирилган барча тинчлик ташаббусларини қўллаб-қувватлашимиз лозим”, — деди Қозоғистон президенти.
У яқин келажакда ўт очиш тўхташига умид билдирди ва шундан сўнг дунёнинг ушбу қисмида ҳам мустаҳкам тинчлик ўрнатиш ҳақида гапириш имкони пайдо бўлишини айтди.
“Қозоғистонга келсак, биз бу мақсадга эришиш учун ўз ҳиссамизни қўшишга тайёрмиз”, — деди Тўқаев.
Шу билан бирга, давлат раҳбари Қозоғистон Россиянинг стратегик ҳамкори экани ва у билан доимий алоқада бўлишини таъкидлади.
“Шунинг учун мақсадимиз — ҳам икки томонлама, ҳам тегишли халқаро ташкилотлар доирасидаги ўзаро ҳамкорлигимизни мустаҳкамлаш учун Россия билан яқин алоқани сақлаб қолиш”, — деди у
Маълумот учун 2022 йилнинг июнь ойида Санкт-Петербург иқтисодий форумида Тўқаев Россия президенти Владимир Путиннинг ёнида Қозоғистон Донецк ва Луганск халқ республикаларининг мустақиллигини тан олмаслигини айтганди.
Изоҳ (0)