Британия ҳукумати Қозоғистон собиқ президенти Нурсултон Назарбоев оиласининг офшор компаниялари орқали Лондонда рўйхатдан ўтган кўчмас мулки ҳақидаги маълумотларни ошкор қилди, деб ёзади The Times газетаси. Кўриб чиқилаётган активларнинг умумий қиймати 40,3 млн фунт стерлингга (тахминан 50 млн доллар) баҳоланмоқда.
Дариға Назарбоева отаси Нурсултон Назарбоев ва қиролича Елизавета II билан Букингем саройида. 2015 йил ноябрь.
Хусусан, мақолада Қозоғистон собиқ президентининг қизи Дариға Назарбоеванинг Челсидаги 31 миллион фунт стерлинглик иккита квартираси ва Лондон шимолидаги Хайгейт шаҳрида 9,3 миллион фунт стерлинглик уйи борлиги кўрсатилган. Мулк Панамада жойлашган Тropicana Аssеts Foundation ва Villa Маgna Foundation офшор компанияларида рўйхатдан ўтган.
Шунингдек, таъкидланишича, Назарбоевнинг куёви Тимур Қулибаев 2007 йилда шаҳзода Эндрюдан мулкни офшор компанияси орқали 15 миллион фунт стерлингга сотиб олган. Қулибаев, шунингдек, Ҳайд-парк яқинидаги 1,5 миллион фунт стерлинг қийматли кўчмас мулкка ҳам эга.
Нурсултон Назарбоев ва Дариға Назарбоева The Times газетасининг изоҳ сўровига жавоб бермади. Тимур Қулибоев манфаатларини ҳимоя қилувчи Schillings компанияси, у “ўз бойлигини 35 йил давомида қонуний ва шаффоф тарзда тўплаган муваффақиятли мустақил тадбиркор” эканини айтди (Қозоғистонда ноқонуний йўл билан олинган активларни қайтариш тўғрисидаги қонун бор).
Офшор компаниялар орқали Қозоғистон собиқ раҳбарининг оиласига тегишли бўлган Лондондаги кўчмас мулк ҳақидаги маълумотлар Британия ҳукумати томонидан юритиладиган хорижий компанияларнинг бенефициар эгалари давлат реестри туфайли оммага ошкор бўлди.
The Times ўз мақоласини ушбу реестрдаги илгари ошкор этилмаган маълумотларга асосланиб тайёрлаган. Нашр шунингдек, Озарбайжон президенти Илҳом Алиев оиласининг кўчмас мулки ва аввалроқ Forbes талқини бўйича африкалик миллиардерлар рейтингига киритилган Ангола собиқ президентининг қизи Изабел душ Сантушнинг мол-мулки ҳақида ҳам эслатиб ўтди.
Пул ювишга қарши кураш воситаси сифатида реестрни яратиш ғояси 2016 йилда Буюк Британиянинг ўша пайтдаги бош вазири Девид Кемерон томонидан ўртага ташланган эди. Бироқ тегишли қонун лойиҳаси 2022 йил баҳорига келибгина Россия—Украина можаросининг кескинлашуви ва уруш фонида қабул қилинган.
Бугунги кунга келиб, Тhе Daily Mail нашрининг ёзишича, реестрда 29 мингга яқин хорижий компания рўйхатдан ўтган. Бироқ 5 000 дан ортиғи ўзларининг якуний эгасини ошкор қилмайди. The Times ўз нашрида қонундаги худди шундай бўшлиқни ҳам эслатиб ўтди.
Шундан келиб чиқилса, Назарбоевлар оиласининг юқоридаги мулклари рўйхати тўлиқ бўлмаслиги мумкин. Аввалроқ ОАВда Қозоғистон собиқ раҳбарининг қариндошларига тегишли Лондондаги бошқа объектлар ҳақида ҳам маълумотлар пайдо бўлганди.
Изоҳ (0)