Қозоғистон президенти Қосим-Жўмарт Тўқаев Шимолий Европанинг бир қатор давлатларида Қуръон ёқиб юборилганини қоралади. Бу ҳақда Akorda хабар берди.
Тўқаев муқаддас китобни ёқиш ҳаракатларини замонавий дунёда кескинликни кучайтириш, халқлар ва давлатлар ўртасидаги ишончга путур етказишга қаратилган номақбул провокация эканини билдирди.
Қозоғистон Жаҳон ва анъанавий динлар етакчилари қурултойининг ташаббускори ҳисобланади.
“Мазкур форум анъанавий дин ва конфессияларнинг нуфузли вакиллари ўртасида самарали мулоқот майдонига айланди”, — дейилади хабарда.
Сиёсатчининг таъкидлашича, диний вандализм ва тегишли давлатлар фуқароларининг масъулиятсиз хатти-ҳаракатлари ортаётгани давлатлар ва динларнинг цивилизациялашган умумий эътироф этилган меъёрларига зид бўлган хатти-ҳаракатлар сифатида бир овоздан қораланиши керак.
Қозоғистон президенти БМТ Бош Ассамблеяси мазкур воқеаларга изоҳ бериши кераклигини айтди.
Қуръоннинг ёқиб юборилишига оид сўнгги маълумотлар
Ўз навбатида, Ироқ мамлакатдан Швеция элчисини ҳайдаган ва яна муқаддас китоб ёқиб юборилса, дипломатик алоқаларни узишини билдирган.
Январь ойида Стокгольмдаги Туркия элчихонаси олдида Қуръон ёқиб юборилганди. Акцияни ултраўнг ва исломга қарши “Қаттиқ курс” партиясининг даниялик-швед фаоли Расмус Палудан бошқарган.
Апрель ойида Швеция маъмурий суди мамлакат Ташқи ишлар вазирлиги томонидан Қуръон ёқиб юборилган намойишларга қўйилган тақиқни бекор қилган. Суд ўз қарорида йиғилишлар ва намойишлар ўтказиш эркинлиги конституциявий ҳимояланган ҳуқуқлар эканини келтирган.
Июнь ойида ироқлик муҳожир Стокгольмдаги бош масжид ёнида Қуръонни ёқиб юборганди.
20 июль куни Швеция полицияси Стокгольмдаги Ироқ элчихонаси олдида Қуръон ва Ироқ байроғи ёқиб юборилган норозилик намойишини ўтказишга рухсат берди. Шундан сўнг юзлаб одамлар Швециянинг Бағдоддаги элчихонасига бостириб кириб, бинога ўт қўйган. Намойишчиларни тарқатиш учун Ироқ полицияси сув пуркагичлардан фойдаланган.
22 июль куни Ироқнинг Даниядаги элчихонаси олдида Қуръон ёқиб юборилди. Акция иштирокчилари буни Швециянинг Бағдоддаги элчихонасига яқинда уюштирилган ҳужумга норозилик деб баҳолади.
Изоҳ (0)