Тошкент вилоятининг Қибрай тумани ҳокимига 5 нафар ўринбосар тайинланди. Бу ҳақда “Дарё”га вилоят ҳокимлиги ахборот хизмати раҳбари Беҳзод Қобулов хабар берди.
Туманда раҳбар кадрлар таркибини кучайтириш ва янгилаш бўйича Халқ депутатлари вилоят Кенгаши махсус ишчи гуруҳининг тавсияси ҳамда Қибрай тумани ҳокимининг фармойишига кўра Ҳамидов Камолиддин Маҳмудович туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — Иқтисодий тараққиёт ва камбағалликни қисқартириш бўлими бошлиғи лавозимига тайинланган.
Шунингдек, Бойматов Фарҳод Одилжонович туман ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари лавозимига, Наипова Раҳима Маъмуржон қизи туман ҳокими ўринбосари — Оила ва хотин-қизлар бўлими бошлиғи лавозимига, Холиқов Фарҳод Худойберганович туман ҳокимининг ёшлар сиёсати, ижтимоий ривожлантириш ва маънавий-маърифий масалалари бўйича ўринбосари лавозимига ҳамда Ҳошимов Акмалхўжа Исроил ўғли эса туман ҳокими ўринбосари — инвестициялар ва ташқи савдо бўлими бошлиғи лавозимига тайинланган.
.jpg)
Аввалроқ вилоят ҳокими Зоир Мирзаев Қибрай тумани ҳокими ўринбосарлари, ҳокимликнинг бошқа барча мутахассисларини вазифасидан озод қилиб, “Кадрлар билан ишлашнинг ‘Қибрай тажрибаси’ жорий қилинади. Бўшаган ўринларга, туман ташкилотларига танлов асосида ёппасига ёшлар ишга олинади. Қибрайга шу тариқа ‘янги қон’ қуйилмаса бўлмайди”, — деганди.
Кейинчалик ҳаракатига изоҳ берган ҳоким “Мен протокол қилиб, мажлис қиламан, десам қўрқаман. Ҳар бир вараққа қўл қўйиб чиқаман кейин. Тиқворади орасига, ҳеч нарсадан қайтмайди. Ҳаммасида шунақа. Битта туманни қилсак, натижа берадиган бўлса, бошқа туманларда ҳам шундай қиламиз. Булар бутунлай ўз хўжалиги қилиб олган. Мен мажбур бўлдим, барибир охирига етамиз”, деганди.
Изоҳ (0)