Ўзбекистон халқ артисти Шерали Жўраев 4 сентябрь куни вафот этгани хабар қилинганди. Ўзбекистон мусулмонлари идораси раиси, муфтий Шайх Нуриддин Холиқназаров Шерали Жўраев ҳақида гапирди.
Муфтий жанозага йиғилганларга президентнинг таъзиясини етказди. Шунингдек, Шерали Жўраев ҳақидаги хотиралар билан бўлишди. Нуриддин Холиқназаров ҳофиз Каъбага кирган кунини иккинчи туғилган куни сифатида белгилаганини эшитганида қойил қолганини қайд этди.
“Бугун ҳаммамиз учун қадрли бўлган, ҳаммамизнинг бевосита тарихимиз билан чамбарчас боғлиқ бўлган буюк ҳофиз нафақат Ўзбекистонда, балки бутун Мовароуннаҳрда буюк Турон халқи ичида эъзозу икромга эга бўлган Шерали ҳожи Жўраевнинг жанозаларида тўпланиб турибмиз. Аллоҳ таоло уларнинг охиратларини обод қилсин, қилган яхши амалларини ўзларига ҳамроҳ қилсин. Жаноза намози, азизлар, марҳумларнинг тириклардаги ҳаққи ҳисобланади. Биз бугун ҳаққимизни адо қилгани тўпландик ва шунинг билан бирга таъзия изҳор қиламиз.
Биз бугун марҳумнинг яқинларига, оила аъзоларига, шогирдларига, адиблар ва бутун халқимизга таъзия изҳор қиламиз. Энг аввало мен омонат таъзияни етказиб қўймоғим лозим. Президентимиз мени вакил сифатида ушбу жанозада Шерали Жўраевнинг яқинлари, қариндошлари, бутун санъат аҳилларига чуқур таъзияларини етказишни сўради. Хонадон аҳллари ва барча яқин азизларининг қайғусига шерик эканликларини изҳор қилди.
Туркиядан даволаниб келганида уйига бориб, кўришдим. Шунда Шерали акам менга бир гапни айтдилар, бир дуо сўрадилар. Юртбошимиз ҳақларига дуо қилишимни сўрадилар. Ҳақиқатан ҳам давлатимиз раҳбари кўп ҳаракат қилди. Пандемия пайтида икки марта ковид бўлдилар. Ўша маҳалда ҳам алоҳида ўзлари назоратга олиб турдилар. Куни кеча ҳарбий госпиталга ётганида ҳам қайғуриб, ҳамма шароитни қилиб турдилар.
Марҳум ҳофизимиз 77 ёшда бандаликни бажо келтирди. Оддийгина чўпон оиласида таваллуд топган йигит келажакда халқ севадиган, халқнинг қалбидан жой оладиган ҳофизга айланди. Шерали акам алоҳида мактаб яратиб кетдилар. Уларнинг қўшиқлари инсонларнинг қалбини жунбишга келтиради. Шунингдек, мумтоз адибларимиз, адабиётимизнинг жуда кўпини халққа танитди. Айниқса, “Ўзбегим” ёки “Инсон қасидаси” ҳеч қачон эсдан чиқмаса керак. Шундай қийин даврларда миллатининг, халқининг дардини куйлай олган ҳофизимиз бутун халқни қалбига ватан, миллат, дин муҳаббатини жойлади. “Аллоҳ-Аллоҳ” деб аталган қўшиқлари билан Аллоҳга бўлган муҳаббатни зиёда қилдилар. Марҳум Шерали жаноблари кечалари қойим эдилар. Ҳамма танишларидан сўранг, кечаси ухламасдан намоз ўқишлигини айтади. Қуръонга ошиқ эдилар. Ҳаттоки бир ҳурматли шоиримиздан эшитдимки, ўзим эшитмаган эканман, қойил қолдим, ҳақларига дуо қилдим — 12 апрелда Каъбага кирган эканлар. Шу кунни иккинчи туғилган куним деб алоҳида эътибор қилар экан.
Кўп заҳматларни ҳам бошидан ўтказди. Аммо янги раҳбаримиз уларнинг заҳматларини муносиб қадрлади”, — дейди муфтий Нуриддин Холиқназаров.
Изоҳ (0)