Тошкент вилояти ИИББ жамоат хавфсизлиги ва соҳавий хизмат ходимлари томонидан 2023 йилнинг беш ойи давомида ўтказилган текширувлар натижасида ўқотар қуролларнинг муомаласига оид қоидаларни бузиш билан боғлиқ 984 та ҳолат аниқланиб, тегишли тартибда чоралар кўрилган.
Шунингдек, назорат тадбирлари давомида ноқонуний сақланган 12 дона ўқотар ов қуроли ва 70 дона ҳар хил калибрли ўқ-дорилар аниқланиб, тегишли тартибда ҳужжатлаштириб олинган. Ушбу ҳолатлар юзасидан 17 нафар шахсга нисбатан жиноят иши қўзғатилган.
Мисол учун, Чиноз туманида ўтказилган тадбирда 55 ёшли шахс (Р.Ш.), яшаш хонадонида 1956 йилда Россияда ишлаб чиқарилган 2 дона 16 ва 28 калибрли отишга яроқли (экспертиза хулосаси) ўқотар ов қуролини ноқонуний равишда сақлаб келаётгани аниқланган. Ҳолат юзасидан Жиноят кодексининг 248-моддаси (ўқотар қуролнинг, ўқ-дориларнинг, ўқотар қурол асосий қисмларининг, портловчи моддаларнинг, портлатиш воситаларининг ёки портлатиш қурилмаларининг қонунга хилоф муомаласи) билан жиноят иши қўзғатилган.
Бундан ташқари, аҳоли орасида олиб борилган тарғибот-ташвиқот тадбирлари давомида 81 дона қурол (шундан 32 дона ов қуроли, 49 дона пневматик қурол) ички ишлар органларига фуқаролар томонидан ихтиёрий равишда топширилишига эришилган.
Ўзбекистонда қуролдан фойдаланиш тартиби
Ўзбекистонда “Қурол тўғрисидаги” қонун 2019 йил 29 июлда президент томонидан имзоланган. Фуқаровий ва хизмат қуроли ҳамда унинг ўқ-дориларини ишлаб чиқариш, таъмирлаш ва реализация қилиш бўйича фаолият фақат Ўзбекистон ҳудудида белгиланган тартибда рўйхатдан ўтган юридик шахслар томонидан амалга оширилади. Ўзбекистонда ноқонуний сақланган қуролларни ўз ихтиёри билан ИИВга топширганларга пул мукофоти берилади.
2022 йилда “Прокуратура тўғрисида”ги қонунга киритилган ўзгартиришларга кўра, прокуратура органлари ходимлари хизмат қуроли ва шахсий ҳимоя воситаларини қонунчиликда белгиланган тартибда сақлаш, олиб юриш ҳамда улардан фойдаланиш ҳуқуқига эгалиги белгиланганди (илгари фақатгина олиб юриши мумкинлиги кўрсатилган).
Изоҳ (0)