Сурхондарё вилояти ҳокими Улуғбек Қосимов Жарқўрғон тумани ҳокимининг икки ўринбосарини ишдан олиш бўйича топшириқ берди. Бир нечта мансабдорга интизомий жазо қўллади. Бу ҳақда “Дарё”га ҳокимлик ахборот хизмати хабар берди.
Таъкидланишича, бу ҳақда вилоят ҳокимининг тадбиркорлар учун навбатдаги қабулида маълум қилинган.
Улуғбек Қосимов навбатдаги онлайн тадбиркорлар қабулини ўтказди. Қабул аввалида ижро интизоми, президент ва ҳукумат қарорлари, топшириқлари, жисмоний ва юридик шахсларнинг мурожаатлари ижроси муҳокама қилинди. Ижро интизомига совуққонлик билан қараган масъулларга нисбатан кескин чоралар кўрилди, — дейилади ҳокимлик хабарида.
Қайд этилишича, вилоят ҳокими Жарқўрғон тумани ҳокимининг биринчи ҳамда хотин-қизлар масалалари бўйича ўринбосарини вазифасидан озод этиш ва Денов тумани ҳокимининг биринчи ўринбосарини Жарқўрғон туманига ротация қилиш бўйича топшириқ берган.
Бундан ташқари Мактабгача ва мактаб таълими, “Аму Сурхон” ИTҲ, Маданий мерос, Насос станциялари ва энергетика бошқармалари, “Сурхондарё сув таъминот” МЧЖ ва “Сурхондарёйўлкўкалам” ДУК раҳбарларини интизомий жазога тортиш топшириғи берилди, — дейди ҳокимлик масъули.
Ҳокимлик ахборот хизмати раҳбари Муродбек Давлатовнинг “Дарё”га аниқлаштиришича, Жарқўрғон тумани ҳокимининг биринчи ўринбосари тадбиркорлар мурожаатини ҳал қилмагани учун, хотин-қизлар масалалари бўйича ўринбосари эса фуқаролар мурожаатига бефарқ қарагани учун жазоланган.
Қўшимча қилинишича, қабулда шаҳар ва туман студиялари орқали 70 нафар тадбиркорнинг 81 та масаладаги мурожаати тингланган. Кўтарилган масалаларнинг 10 таси қабул давомида ҳал этилган. Қолган мурожаатларни батафсил ўрганиш ва ҳал этиш вазифаси масъулларга йўналтирилган. Ижроси назоратга олинган.
Изоҳ (0)