Тошкент метро поезди светофор ўчиб қолгани сабаб тўхтаб қолди

Тошкент метрополитени “Беруний” бекатида поезд тўхтаб қолгани айтилган хабарларга муносабат билдирди.

Маълум қилинишича, 4 сентябрь куни соат 10:10 ларда метрополитенни ташқи электр энергия билан таъминловчи корхоналар электр тармоғида қисқа узилиш содир бўлган. Шу сабабли “Чорсу” бекатининг светофори ўчиб қолган ва бунинг натижасида 41-сонли ҳаракат таркиби белгиланган йўриқномага асосан бекатга кириб келишда тўхтаб турган.

Электр энергияни қайта тиклаш юзасидан тезкор чора-тадбирлар натижасида 1,5 дақиқадан сўнг ҳаракат таркиби ўз ҳаракатини давом эттирган.

“Ҳозирги вақтда йўналишда поездлар ҳаракати белгиланган жадвалга кўра амалга оширилмоқда”, — дейилади муносабатда.

2022 йилда Тошкент метрополитенида кузатилган муаммолар ҳақида бир қатор хабарлар берилган эди. Хусусан, поездлар бир неча бор тўхтаб қолган, ҳаракат йўналиши чекланганди. Шунингдек, Тошкент ерусти метросида юз берган қисқа туташув юзасидан расмий маълумот берилган, метро поезди “Олмазор” бекатида тўхтаб қолган, метро поезд носозлик сабаб “Чорсу” бекатида йўловчиларни тушириб қолдирган эди.