Ўзбекистонда август ойида инфляция 0,5 фоизни ташкил этди

Ўзбекистонда август ойида истеъмол нархлари индекси 0,5 фоизга ошди. Бу ҳақда Статистика қўмитаси тақдим этган маълумотларда келтирилган.

Қайд этилишича, йил бошидан буён инфляция 3,8 фоизни ташкил этган, бу сўнгги беш йилдаги энг паст кўрсаткичдир. Ўртача ойлик нархлар 0,5 фоизга ошган. Шунингдек, йиллик инфляция бир оз ўсиб, 8,9 фоизни ташкил этган. Сўнгги йилларда биринчи марта нархларнинг ўсиши 9 фоизлик белгидан пастга тушган.

Озиқ-овқат маҳсулотлари арзонлашишдан тўхтаб, ўсишга ўтган — бу сафар ойига 0,6 фоизга ошди. Йил бошидан (3,7 фоиз) ва ўн икки ой давомида (10,6 фоиз) нархларнинг ўсиши сўнгги йилларда минимал даражада сақланиб қолди.

Озиқ-овқат маҳсулотларининг энг кучли ўсиши сабзавотларда қайд этилган — ойига 3,7 фоиз. Хусусан, қовоқ икки баробар ўсишни кўрсатди. Барча жойда унинг нархи бир ой давомида чоракдан кўпроққа ошган, йиллик ўсиш эса 81,1 фоизни ташкил этган.

Шунингдек, август ойида ишлаб чиқарилган маҳсулотлар 0,4 фоизга қимматлашган, нархлар эса йил давомида атиги 7,3 фоизга ошган. Кийим ва пояфзал нархларининг ўсиши 0,1 фоизгача секинлашган, ўтган август ойига нисбатан мос равишда 6,6 фоиз ва 5,7 фоизни ташкил этган. Мебел учун ойлик ўсиш 0,2 фоизни, йиллик ўсиш эса 6,5 фоизни ташкил этган.

Ўтган ойда хизматлар кўрсатиш соҳасида нархлар энг юқори кўрсаткични қайд этган — 0,7 фоиз. Ўтган август ойига нисбатан ўсиш 2019 йилдан буён энг юқори кўрсаткич (8,5 фоиз) бўлди. Шу билан бирга, умумий овқатланиш 1,1 фоизга (йил давомида 25,1 фоизга), меҳмонхона хизматлари атиги 0,1 фоизга (21,2 фоиз) қимматлашган.

Марказий банк 2023 йил якуни бўйича инфляция даражаси 8,5–9,5 фоиз атрофида бўлишини прогноз қилганди.

2022 йилда йиллик инфляция 12,3 фоизни ташкил этган. 2021 йилда бу кўрсаткич 9,98 фоиз, 2020 йилда 11,1 фоиз, 2019 йилда 15,2 фоиз, 2018 йилда 14,3 фоиз, 2017 йилда 14,4 фоиз бўлган.

Инфляция ўзи нима? 

Инфляция деганда мамлакатдаги товар ва хизматлар баҳоси умумий даражасининг ошиши (ўсиши) тушунилади. Унинг асосий кўрсаткичи истеъмол нархларининг маълум бир даврдаги ўзгариши ҳисобланади. Нархларнинг умумий даражаси кўтарилиши натижасида мамлакат пул бирлиги (миллий валюта) харид қобилиятининг пасайиши рўй беради. Бу эса ўз навбатида, давлат пул бирлигининг қадрсизланишига олиб келади.