Кадастр паспортини расмийлаштириш учун ариза билан мурожаат қилган эдингиз, аммо сизга рад жавоби келди. Демак, бунга бир неча сабаблар бор. Кадастр агентлиги матбуот котиби Неъмат Атамуродов қай ҳолларда кадастр ҳужжатини бериш тақиқланганини маълум қилди.
Фото: “Дарё”
Кўчмас мулк объектига кадастр паспорти беришни рад этишга сабаб бўладиган биринчи ҳолат — ҳужжат бўйича сўровномада нотўғри маълумотлар кўрсатилишидир.
Кўчмас мулк объектларига бўлган ҳуқуқларни тасдиқловчи ҳужжатлар мавжуд эмаслиги ҳам кадастр паспорти олишга тўсқинлик қилади.
Ариза берувчи ёки унинг вакили келишилган манзилда бўлмаган тақдирда ҳам ҳужжат бериш рад этилади.
Шу билан бирга, ваколатли органлар томонидан кадастр паспортини расмийлаштириш бўйича кўчмас мулк объектига тақиқ ёки хатлов қўйилган бўлса ҳам кадастр паспорти берилмайди.
Аввалроқ Кадастр агентлиги Ўзбекистонда 2023 йил бошидан бери 3 минг гектар ер ўзбошимчалик билан эгаллаб олинганини хабар қилганди.
Изоҳ (0)