Сингапур бош вазирининг собиқ ўринбосари Тарман Шанмугаратнам мамлакатда бўлиб ўтган президентлик сайловларида 70,4 фоиз овоз билан ғалаба қозонди. Бу ҳақда Sinxua ахборот агентлиги хабар берди.
Унинг президентликдаги рақиблари Нг Кок Сонг ва Тан Кин Лиан мос равишда 15,72 фоиз ҳамда 13,88 фоиз овоз тўплаган. Сайловларда жами 2,48 миллиондан ортиқ сингапурликлар қатнашган.
Эслатиб ўтамиз, шу йилнинг 23 май куни Сингапур президенти Ҳалима Яқуб икки кунлик давлат ташрифи билан Ўзбекистонга келганди. 24 май куни Кўксарой қароргоҳида Сингапур раҳбари Ҳалима Яқубни Ўзбекистон президенти Шавкат Мирзиёев самимий қарши олган, шунингдек, у Самарқандга “Афросиёб” поездида борган эди.
Ҳалима Яқуб 2017 йилда президент сайловида ўз номзодини илгари суриш учун парламент раиси лавозимидан кетганди. Сингапур қонунчилигига кўра, ўша йилги сайловларга фақат малай халқига мансуб шахслар номзод қўйиши мумкин бўлган. Боиси 1970 йилдан буён бу лавозимга малайлар ўтирмаган эди. Шу тариқа рақобат анча пасайиб кетади ва сўнггида Ҳалима Яқуб қийинчилик ва ортиқча қаршиликларсиз мамлакат президенти этиб тайинланади. Айнан тайинланади, чунки талабларга жавоб берадиган бошқа номзод қолмаган эди.
Бунинг ортидан Сингапурда ҳозиргача бир гуруҳ фуқаролар уни лавозимга адолатсиз ўтирганликда айблайди. Жумладан, мамлакатнинг собиқ президентларидан бири Тан Ченг Бок Ҳалимани “Сингапур тарихидаги энг зиддиятли президент” деб атайди.
Ҳалима Яқуб эса бу гапларга қуйидагича жавоб берган: “Шуни айтишим мумкинки, мен Сингапур халқига хизмат қилиш учун қўлимдан келганини қилишга ваъда бераман. Бу сайловлар ўтказилиши ёки ўтказилмаслигидан қатъий назар, ўзгармайди”.
Изоҳ (0)