Uzbekistan Airways компанияси Тошкент халқаро аэропортида ўз парки учун навбатдаги A320neo самолётини қабул қилиб олди. Бу ҳақда авиакомпания матбуот хизмати хабар берди.
Ўрта масофага парвоз қилиш учун мўлжалланган авиалайнер узоқ муддатли лизинг асосида China Aircraft Leasing Group Holdings Limited (CАLC) компаниясидан сотиб олинган. 168 ўринга мўлжалланган Airbus A320neo Куала-Лумпурдан Тошкентга Uzbekistan Airways'нинг анъанавий ливреясида етиб келди. Ҳаво кемаси миллий авиаташувчи ва CАLC лизинг компанияси ўртасидаги узоқ муддатли ҳамкорликнинг бошланиши ҳисобланади.
Қайд этилишича, Airbus A320neo турдаги ҳаво кемалари ўрта масофали лайнерлар орасида энг машҳур ва яхшиларидан бири ҳисобланади ҳамда хавфсизлик ва тежамкорликнинг энг юқори даражасини тақдим этади. Олдинги авлод авиалайнерларига нисбатан карбонад ангидрид чиқариш даражаси 50 фоизга камайтирилгани туфайли самолёт рақобатчилари орасида энг экологик тоза саналади.
“Бу янги ҳамкоримиз CАLC компаниясидан харид қилинган Uzbekistan Airways'нинг ўрта масофали йўналишларида йўловчилар оқимини оширишга ёрдам берадиган илк ҳаво кемасидир. Бугунги кунда авиакомпания Airbus А320 оиласига кирувчи 19 та самолётдан муваффақиятли равишда фойдаланиб келмоқда ва яқин келажакда биз паркни ушбу турдаги яна иккита авиалайнер билан тўлдиришни режалаштирмоқдамиз. 2023 йил давомида Uzbekistan Airways ўзининг самолётлар паркини бешта Airbus A320neo ва иккита LET L-410 ҳаво кемалари билан кенгайтиради” — дейди Uzbekistan Airways бошқарув раиси Шуҳрат Худайкулов.
Авиакомпания янги ҳаво кемасидан Тошкент шаҳри ва республика вилоятларидан амалга ошириладиган авиақатновларида фойдаланишни режалаштирмоқда.
CАLC компанияси ҳақида
China Aircraft Leasing Group Holdings Limited (CАLC) самолётларнинг оператив лизинги, уларни сотиб олиш ва қайта лизингга бериш ҳамда тизимли молиялаш, шунингдек, паркни режалаштириш, уни янгилаш, ҳаво кемаларни демонтаж қилиш ва эҳтиёт қисмларни сотишдек қўшимча қиймат хизматлари каби анъанавий вазифаларни ўз ичига олади.
Январь ойида Uzbekistan Airways Airbus авиақурилиш компанияси билан A320neo оиласига тегишли 12 та самолёт (саккизта A320neo ва тўртта A321neo) харид қилиш учун шартнома имзолаганди.Янги самолётлар Airbus Airspace салонига эга бўлиб, у йўловчиларга ҳаво транспорти бозорида юқори даражадаги қулайликни тақдим этади.
Изоҳ (0)