Судьялар олий кенгаши ҳузуридаги Судьялар олий мактабининг Судьялик лавозимларига номзодларни тайёрлаш курсига кириш синовларида айрим талабгорларга 0 балл қўйилгани ижтимоий тармоқларда баҳс-мунозараларга сабаб бўлди. Судьялар олий кенгаши мазкур ҳолатга муносабат билдирди.
Қайд этилишича, Судьялик лавозимларига номзодларни тайёрлаш курсига кириш синовларини топшираётганлар, кўпгина хабарларда урғу берилаётгани каби судьяликка номзодлар эмас, балки талабгор ҳисобланади.
Талабгорнинг судьяликка номзод бўлиши учун кириш синовларидан муваффақиятли ўтиб, Судьялик лавозимларига номзодларни тайёрлаш курси тингловчиси бўлиши ва курсни муваффақиятли битириши шарт (таҳсил давомийлиги 1 йил).
“Шу босқичлардан ўтган мутахассисгина судьяликка номзод бўлиши мумкин. Бироқ шундаям судьялик лавозими кафолатланмайди. Олдинда яна бир довон борки, энди номзод Судьялар олий кенгаши томонидан ўтказиладиган бўш судьялик лавозимлари учун очиқ танловда иштирок этиши керак. Очиқ танлов муқобиллик асосида ўтказилиб, муносибларгина судьялик лавозимига тайинланаётгани жамоатчиликка маълум”, — дейилади муносабатда.
Кириш синовларининг иншо босқичида 50 тадан ортиқ мавзулар ичидан 3 таси талабгорлар томонидан ёпиқ конвертлар орасидан таваккалчилик асосида танлаб олиниши ҳақида илгари ҳам маълумот берилганди. Шунингдек, танлаб олинган мавзулар бўйича ёзилган иншо дафтарларининг муқоваси олиниб, биринчи варағига махсус шифр қўйилган ҳолда (шу тариқа талабгорлар шахссизлантирилади, бундан мақсад холисликни таъминлаш, турли шубҳа ва коррупсион ҳолатларнинг олдини олишдир) махсус баҳоловчи комиссияга топширилиши, иншо ёзилган дафтар варақларига (муқовасига эмас) талабгор ўз исми-шарифини ёзиши ёки бирор бир кўзга яққол ташланадиган белги қўйиши мумкин эмаслиги ҳам айтилиб, акс ҳолда 0 балл қўйилиши ҳақида огоҳлантирилган.
Кириш синовларининг айни шу босқичида 8 нафар талабгорга (уларнинг бир нафари иншо дафтарини топширмай, ўзи билан олиб кетган), жорий тартибларга риоя қилмагани учун 0 балл қўйилган.
“Мазкур балл уларнинг билим-салоҳиятини акс эттирмайди, балки тартиб-қоидаларга риоя этилмаганининг аччиқ ҳосиласи, холос”, — дея таъкидланади хабарда.
Бундан олдин Ўзбекистонда 6 нафар судья лавозимида ўзгариш рўй бергани, Қашқадарёда фуқаро ногиронлик нафақасини ололмай қолганига сабаб бўлган судьяга чора кўрилгани, Судьялар олий кенгашида бир қатор янги тайинловлар амалга оширилгани тўғрисида хабар берилганди.
Изоҳ (0)