Хитойнинг “Standart хариталар картографик хизмати” давлат сайти 2023 йилга мўлжалланган янги, расман тасдиқланган географик хариталар тўпламини чиқарди, унда Россия ҳудудларининг бир қисми Хитой таркибига киритилган, деб ёзади “РБК”.
Гап Амур дарёсида жойлашган Болшой Уссурий ороли ҳақида бормоқда, ҳудуд Россия ва Хитой ўртасида 2008 йилда тузилган шартнома асосида бўлинган. Нашр қилинган харитада орол мамлакатнинг энг шарқий нуқтаси сифатида алоҳида қайд этилган.
“Намунавий харита Хитой ва дунёнинг бошқа мамлакатлари чегараларини лойиҳалаш бўйича миллий стандартларга мувофиқ тузилган”, — дейилади тушунтириш қайдномасида.
Янги расмий карталар тўплами янгиликлар, китоблар, реклама материалларида иллюстрация сифатида фойдаланиш учун мўлжалланган. Улардан маълумот базаси харитаси сифатида ҳам фойдаланиш мумкин, деб таъкидлади хизмат.
Ҳиндистоннинг Аруначал-Прадеш штати (Хитой уни Жанубий Тибет деб атайди) ва 1962 йилги уруш пайтида Хитой томонидан босиб олинган Ладахдаги Оқсай Чин чегара ҳудуди ҳам янги географик харитада Хитой ҳудуди сифатида жой олган.
Ҳиндистон Хитойга “Аруначал-Прадеш Ҳиндистоннинг ажралмас қисми бўлиб келгани ва шундай бўлиб қолишини” бир неча бор таъкидлаган. Ҳиндистон Ташқи ишлар вазирлиги матбуот котиби Ариндам Багчи Пекинга харита юзасидан кескин норозилик билдирди.
Харитада, шунингдек, Хитойнинг Тайван оролига ва Жанубий Хитой денгизининг катта қисмига даъвосини ифодаловчи “тўққиз штрихли чизиқ” кўрсатилган.
Изоҳ (0)