Ҳиндистон ТИВ Хитой билан чегарадаги вазиятни “нозик” деб атади. Ҳимолайда икки давлат қўшинлари жуда яқин жойлашган
Ҳиндистон ва Хитой ўртасидаги вазият нозиклигича қолмоқда, чунки ғарбий Ҳимолайдаги Ладах минтақасининг бир қанча қисмларида икки давлат ҳарбий кучлари бир-бирига жуда яқин жойлашган. Бу ҳақда Ҳиндистон ташқи ишлар вазири Субраманям Жайшанкар India Today анжуманида айтиб ўтди.
“Хитойдаги вазият жуда нозик ва мураккаб. Чегара келишувлари бузилишда давом этар экан, Хитой билан нормал муносабатлар бўлмайди. Муайян ҳудудларда патрул хизматини ўзаро келишиб олиш керак. Биз патруллик қилинмайдиган ҳудудларни 1970 йилларда танлаган эдик”, — деди Жайшанкар.
Вазирнинг қўшимча қилишича, у Хитой Коммунистик партияси Марказий қўмитасининг ташқи ишлар комиссияси девонхонаси раҳбари Ван И ташқи ишлар вазири бўлган пайтда у билан учрашганида “чегара” инқирозини ҳал қилиш бўйича келишувга эришган. “Ҳозир мен янги ташқи ишлар вазири Син Ган билан учрашдим. Унга аввал тинчликни бузиб, кейин ҳеч нарса бўлмагандек муносабатларни давом эттира олмаслигимизни аниқ қилиб билдирдим”, — деди Жайшанкар. Унинг таъкидлашича, “олдинга силжиш учун” Хитой вазиятни ҳал қилиши керак.
Хитой ва Ҳиндистон ўртасидаги муносабатлар 2022 йил декабрь ойида Ҳиндистоннинг Аруначал-Прадеш штатидаги Таванг округида икки давлат ҳарбийлари Ҳақиқий назорат чизиғи (Line of Actual Control, LAC) бўйлаб тўқнашганидан сўнг кескинлашган. Ҳар икки томондан бир неча аскар енгил яраланган, шундан сўнг Ҳиндистон ва Хитой кучлари минтақадан олиб чиқиб кетилган.
LAC — Жанубий Тибетда Ҳиндистон ва Хитой ўртасидаги баҳсли чегара ҳудудларидаги шартли демаркация чизиғи. Хусусан, Ҳиндистон Тибет тоғли ҳудудининг бир қисми бўлган ва Пекин назорати остидаги Аксайчин минтақасига даъво қилса, Хитой Нью-Деҳли назоратидаги Аруначал-Прадеш ҳудудини ўзиники деб билади. Ҳудудий можаро 1951 йилда Хитой Тибет устидан назорат ўрнатганидан бери давом этиб келмоқда.
2020 йил июнь ойида Хитой билан чегарадаги жангда 20 нафар ҳинд аскари ҳалок бўлди. Нью-Деҳли, шунингдек, рақамларни кўрсатмасдан, Хитой томонининг йўқотишлари ҳақида хабар берган. Воқеа сабаби сифатида Ҳиндистон расмийлари Хитой томонидан статус-квонинг бузилишини айтган.
