Россия Бразилия Авиаҳалокатларини текшириш ва олдини олиш марказига (CENIPА) “Вагнер” хусусий ҳарбий компанияси (ХҲК) асосчиси Евгений Пригожиннинг ўлимига сабаб бўлган Embraer Legacy 600 самолёти ҳалокати бўйича ҳозирча халқаро қоидаларга мувофиқ текширув ўтказишни режалаштирмаганини маълум қилди. Бу ҳақда Reuters хабар бермоқда.
Бразилия маркази аввалроқ тергов ҳаракатларида иштирок этиш ҳақида сўров юборган. Пригожин фойдаланган Embraer бизнес-жети ишлаб чиқарувчиси Бразилия компанияси бўлиб, шуни инобатга олган ҳолда, Бразилия терговда ёрдам беришни таклиф қилган, деб ёзади Reuters. Шу билан бирга, CENIPА бундай ҳамкорлик “авиация хавфсизлигини яхшилашга” ёрдам беришини таъкидлаган, аммо бу фақат халқаро қоидаларга мувофиқ текширув ўтказилган тақдирдагина амалга ошиши мумкин.
Reuters қайд этишича, Росавиация CENIPА’га рад жавоби беришга ҳақли, чунки Пригожиннинг самолёти халқаро эмас, балки ички рейсни амалга ошираётган эди. Бразилия томони келажакда ушбу турдаги самолётлар билан юзага келиши мумкин бўлган ҳодисаларнинг олдини олишга интилмоқда, бироқ россиялик ҳамкасбларининг хатти-ҳаракатлари CENIPА ва самолёт ишлаб чиқарувчиси Embraer учун қийинчиликлар туғдирмоқда, деб таъкидлайди агентлик. Россиянинг Бразилия таклифини қабул қилишдан бош тортиши “шаффоф тергов бўлмаслигини” кўрсатади, деди Reuters манбаси, авиаҳалокатларни текшириш бўйича эксперт Жефф Газзетти.
Пригожиннинг дафн маросими ҳарбий эҳтиромларсиз ўтди
23 август куни авиаҳалокатда вафот этган “Вагнер” асосчисининг дафн маросими 29 август куни Санкт-Петербургдаги Порохов қабристонида бўлиб ўтди. Маросим ёпиқ форматда ўтказилди.
“Вагнер” ёлланма аскарлари ва Пригожиннинг бошқа тарафдорлари дафн маросимига таклиф қилинмаган — ОАВ хабарларига кўра, маросимда фақат унинг яқинлари иштирок этган. “Вагнер” ХҲК раҳбарини дафн этиш пайтида ҳарбий одатларга ҳам риоя қилинмаган, аслида эса, президент фармонига кўра, Россия Қаҳрамони унвонига эга бўлган одамларнинг дафн маросими тегишли жараёнлар билан ўтиши керак.
Авиаҳалокат “Вагнер” исёнидан икки ой ўтиб юз берди
Евгений Пригожинга тегишли бизнес-жет Москвадан Санкт-Петербургга кетаётганда Тверь вилоятида ҳалокатга учради. Самолёт бортида уч нафар экипаж аъзоси ва етти нафар йўловчи, жумладан Пригожиннинг ўзи ва ХҲК асосчиларидан бири Дмитрий Уткин бўлган.
Оммавий ахборот воситаларида самолёт қулаши сабабларининг версиялари орасида бортда бомба портлаши ва зенит-ракета билан уриб туширилиши бор.
Аксарият сиёсий таҳлилчилар Россияда воқеадан роппа-роса икки ой олдин ҳарбий исён уюштирган Пригожиннинг ўлимига махсус хизматлар алоқадор деб ҳисоблаяпти.
Изоҳ (0)