Буюк Британия ташқи ишлар вазири Жеймс Клеверли “таранг муносабатларни барқарорлаштириш учун” 30 август куни Хитойга ташриф буюради. Сафар анча олдин режалаштирилган ва бир неча бор қолдирилган, деб ёзмоқда Тҳе Guardian.
Бу Буюк Британия ташқи ишлар вазирининг сўнгги беш йил ичида Хитойга биринчи расмий ташрифи бўлади. Хитой томони Жеймс Клеверлининг ташрифини кутаётганини тасдиқлади. Ушбу сафар Буюк Британия ва Хитой ўртасидаги ёмонлашган муносабатларни барқарорлаштириш учун мўлжалланган.
“Томонлар муаммоли масалалар бўйича батафсил фикр алмашади. Буюк Британия ва Хитой томонлари ўзаро ҳурмат руҳида ҳамкорлик қилади, деб умид қиламиз”, — деди Хитой ТИВ матбуот котиби Ван Венбин.
У Клеверлининг ташрифи Буюк Британия ва Хитой ўртасидаги муносабатларни ривожлантиришга ёрдам беришига умид билдирди ҳамда бу ҳар икки давлат манфаатларига мос келишини таъкидлади. Британия вазири ташриф давомида хитойлик дипломатлар ва сиёсатчилар билан бир неча алоҳида учрашувлар ўтказади.
Клеверлининг Хитойга ташрифи анча аввал режалаштирилган эди, бироқ у бир неча бор қолдирилди. Хусусан, Буюк Британия ТИВ раҳбарининг Хитойга келиши июль ойида кутилган. Хитой ва Буюк Британия ўртасидаги муносабатларнинг совуқлашишида Британия бош вазири Риши Сунак муҳим рол ўйнади. Май ойида у Пекин “дунё хавфсизлиги ва фаровонлиги учун энг катта таҳдид” эканини айтганди.
Изоҳ (0)