АҚШ президентлигига номзод ва собиқ давлат раҳбари Дональд Трамп ўзига қўйилган айбловларни муттаҳамлик деб атади. Бу ҳақда у ўзининг YouTube каналида радиобошловчи Гленн Бек билан суҳбатда гапирди.
Бошловчи Трампдан агар қамалса, у ердан сайлов кампаниясини олиб бора оладими ёки йўқлигини сўради.
“Бу қачондир содир бўлади, деб ўйламайман. Ҳар бир очилган иш — муттаҳамлик”, — деб жавоб берди собиқ президент.
АҚШда 2024 йилги президентлик сайловларида қатнашмоқчи бўлган Трампга нисбатан ҳозиргача тўртта айблов қўйилган. Август ойи бошида у барча айбловлар бўйича 561 йиллик қамоқ жазоси кутаётганини маълум қилди.
Трамп, жумладан:
- Бизнес ҳужжатларни қалбакилаштиришда;
- Флоридадаги қароргоҳида махфий ҳужжатларни нотўғри сақлашда;
- 2020 йилги президентлик сайловларидан кейин тил бириктириш, натижада 2021 йил январь ойида Капитолийга бостириб киришга ундашда;
- Жоржиядаги сайлов натижаларини ўзгартиришга уринишда айбланмоқда.
25 август куни Трамп Фултон округи қамоқхонасига (Жоржия) келди ва у ерда 20 дақиқага яқин вақтни расман ҳибсда ўтказди. Полиция унинг бўйи ва вазнини ўлчади, бармоқ изларини ва магшот (қамоқ сурати) олди, шундан сўнг у 200 минг доллар гаров эвазига қўйиб юборилди.
Изоҳ (0)