Британия нашри Хитой эҳтимолий урушга тайёрланаётганини билдирувчи белгиларни маълум қилди

Британиянинг Тhе Economist журнали Хитойнинг Тайванга қарши эҳтимолий урушга тайёрланаётганидан далолат берувчи белгилар ҳақида ёзди.

Нашрнинг қайд этишича, сўнгги ўн йилликларда Хитой эҳтимолий санкциялар таъсиридан қочиш учун ҳарбий ва иқтисодий соҳада сезиларли даражада мустаҳкамланган. Бундан ташқари, Хитой ҳукумати озиқ-овқат маҳсулотларини захиралаш орқали мамлакат хавфсизлиги ҳақида астойдил қайғурмоқда. Буларнинг барчаси Пекин урушга тайёрланаётганидан дарак бериши мумкин, дейилади мақолада.

Нашр мақоласи муаллифининг фикрича, Хитой иқтисодий ва ҳарбий қудратининг ўсиши АҚШ манфаатларига таҳдид солади, бу эса кенг кўламли можарога олиб келиши мумкин. Шу билан бирга, Тайван рақиб кучлар ўртасидаги энг эҳтимолий қайноқ нуқтага айланиши мумкин.

“Хитой раҳбари Си Цзиньпин ўз ҳукуматидаги хавфсизлик хизмати раҳбарларига энг ёмон сценарийга тайёргарлик кўришни буюрди. Балки улар уруш ҳолатида Хитойни имкон қадар ўзини ўзи таъминлай олишини истаётгандир”, — дейилади мақолада.

АҚШ ва Хитой ўртасида уруш муқаррар эмас, аммо хавф етарлича юқори. Шу боис, экспертнинг фикрича, Ғарб давлатлари Пекин ҳаракатларини диққат билан кузатиши, асосий маҳсулотлар ва ресурсларнинг етказиб берилиш ҳажмини таҳлил қилиши керак.

Хусусан, нефть ва газ таъминоти, ички кўмир истеъмоли, соя ва буғдой харидига эътибор қаратиш лозим.

Кузатувчининг фикрича, Хитой харидларини синчиклаб кузатиш яқинлашиб келаётган ҳужумдан эрта огоҳлантириш тизимини яратади, чунки таъминотнинг кескин кўпайиши Пекин ҳарбий амалиётлар бошлаш ниятида эканини билдиради.