Buyuk Britaniya tashqi ishlar vaziri Jeyms Kleverli “tarang munosabatlarni barqarorlashtirish uchun” 30-avgust kuni Xitoyga tashrif buyuradi. Safar ancha oldin rejalashtirilgan va bir necha bor qoldirilgan, deb yozmoqda The Guardian.
Bu Buyuk Britaniya tashqi ishlar vazirining so‘nggi besh yil ichida Xitoyga birinchi rasmiy tashrifi bo‘ladi. Xitoy tomoni Jeyms Kleverlining tashrifini kutayotganini tasdiqladi. Ushbu safar Buyuk Britaniya va Xitoy o‘rtasidagi yomonlashgan munosabatlarni barqarorlashtirish uchun mo‘ljallangan.
“Tomonlar muammoli masalalar bo‘yicha batafsil fikr almashadi. Buyuk Britaniya va Xitoy tomonlari o‘zaro hurmat ruhida hamkorlik qiladi, deb umid qilamiz”, — dedi Xitoy TIV matbuot kotibi Van Venbin.
U Kleverlining tashrifi Buyuk Britaniya va Xitoy o‘rtasidagi munosabatlarni rivojlantirishga yordam berishiga umid bildirdi hamda bu har ikki davlat manfaatlariga mos kelishini ta’kidladi. Britaniya vaziri tashrif davomida xitoylik diplomatlar va siyosatchilar bilan bir necha alohida uchrashuvlar o‘tkazadi.
Kleverlining Xitoyga tashrifi ancha avval rejalashtirilgan edi, biroq u bir necha bor qoldirildi. Xususan, Buyuk Britaniya TIV rahbarining Xitoyga kelishi iyul oyida kutilgan. Xitoy va Buyuk Britaniya o‘rtasidagi munosabatlarning sovuqlashishida Britaniya bosh vaziri Rishi Sunak muhim rol o‘ynadi. May oyida u Pekin “dunyo xavfsizligi va farovonligi uchun eng katta tahdid” ekanini aytgandi.
Izoh (0)