Африканинг Габон давлатида ҳарбийлар ҳокимиятни қўлга олганини эълон қилди. Уларнинг баёноти мамлакат Марказий сайлов комиссияси президентлик сайлови натижаларини эълон қилганидан бир неча дақиқа ўтиб, маҳаллий телевидениеда эфирга узатилди. МСК сайловда амалдаги президент Али Бонго Ондимба 64,27 фоиз овоз олиб, учинчи муддатга қайта сайланганини эълон қилганди.
Габон 24 телеканали эфирида бир гуруҳ юқори мартабали офицерлар ўзларини мамлакатнинг барча куч тузилмалари вакили деб атаб, сайлов натижаларидан норози эканини айтишди – овоз бериш натижалари бекор қилинди. Ҳарбийлар Габон чегаралари ёпилишини ва барча ҳокимият институтлари тарқатиб юборилишини маълум қилди.
“Габон халқи номидан биз амалдаги режимга чек қўйиб, дунёни ҳимоя қилишга қарор қилдик”, — деди офицерлар.
Габон президенти ва ҳукумати ҳарбийларнинг ҳокимиятни эгаллаш тўғрисидаги баёнотига ҳали расман изоҳ бермади. Габондаги халқаро агентликлар мухбирлари хабар беришича, мамлакат пойтахти Либревил кўчаларида отишма овозлари эшитилмоқда.
Али Бонго Ондимба 2009 йилдан буён президентлик қилади
2019 йил январь ойида ҳам Габонда ҳарбийлар давлат тўнтариши уюштиришга ва Али Бонго Ондимбани ҳокимиятдан четлатишга ҳаракат қилганди, аммо ўшанда ҳукумат кучлари қўзғолонни бостиришга муваффақ бўлган. 55 давлатни ўз ичига олган Африка Иттифоқи давлат тўнтаришига уринишни қоралаган.
Али Бонго Ондимба 2009 йилдан буён президентлик қилади. У 1967 йилда ҳокимият тепасига келган отаси Умарнинг вафотидан кейин Габонни бошқаришга киришган.
Габон Африканинг иқтисодий жиҳатдан энг барқарор давлатларидан бири ва минтақа учун йирик нефть экспортчиси ҳисобланади. Мамлакатда 2,2 миллионга яқин аҳоли истиқомат қилади.
Нигердаги ҳарбий тўнтариш
26 июль куни Африканинг яна бир давлати — Нигерда ҳарбий тўнтариш содир бўлди. Президент гвардияси давлат раҳбари Муҳаммад Базумни ҳокимиятдан четлатди. Икки кундан сўнг президент гвардияси бошлиғи генерал Абдураҳмон Тчиани ўзини янги давлат раҳбари деб эълон қилди.
Ғарбий Африка давлатлари иқтисодий ҳамжамияти (ECOWAS) мамлакатлари Нигерга ҳарбийларни киритишга тайёрлигини эълон қилди. Бунга жавобан давлат тўнтаришлари натижасида ҳокимиятга келган ҳарбийлар бошқарувидаги яна икки Африка давлати — Мали ва Буркина-Фасо “Нигер ишларига ҳар қандай ҳарбий аралашув уларга қарши уруш эълон қилиш билан баробар бўлишини” билдирди.
Изоҳ (0)