Ўзбекистонда 2023/2024-ўқув йили учун ОТМларнинг бакалавриат таълим йўналишларига кириш тест синовлари натижаларига кўра 193 421 нафар абитуриент талабаликка тавсия этилганди. Олий таълим, фан ва инновациялар вазирлиги уларнинг қанчаси аёллар ва эркаклар эканлигини маълум қилди.
Қайд этилишича, олий таълим муассасаларининг бакалавриат таълим йўналишларига ўқишга кириш учун онлайн рўйхатдан ўтган 948 491 нафар абитуриентнинг
- 419 327 нафарини (44,2 фоиз) эркаклар
- 529 164 нафарини (55,8 фоиз) аёллар ташкил этди.
Тест синови натижаларига кўра талабаликка тавсия этилган 193 421 нафар абитуриентнинг
- 100 491 нафари (52 фоиз) — эркаклар;
- 92 930 нафари (48 фоиз) — аёллар ҳиссасига тўғри келади.
Тест синовида аёллар эркакларга нисбатан юқорироқ балл тўплаган.
Талабаликка тавсия этилган абитуриентларнинг ўртача ўтиш бали давлат гранти асосида:
- эркакларда — 112,4 баллни;
- аёлларда — 125,1 баллни;
тўлов-контракт асосида:
- эркакларда — 88,9 баллни;
- аёлларда — 98,5 баллни ташкил этган.
Қайд этилишича, эркаклар ва аёлларда ўртача ўтиш балларининг бундай фарқ қилиши улар рўйхатдан ўтишда танлаган таълим йўналишлари ва улардаги ўтиш баллари билан боғлиқ.
Таълим соҳалари бўйича фоиз ҳисобида олинганда ижтимоий таъминот (91,7 фоиз), тиллар (88,5 фоиз) ва таълим (78,7 фоиз) соҳаларига аёллар, транспорт хизматлари (93,5 фоиз), архитектура ва қурилиш (84,8 фоиз) ва ахборот-коммуникация технологиялари (75,3 фоиз) соҳаларига эркаклар кўпроқ талабаликка тавсия этилган.
Изоҳ (0)