Шавкат Мирзиёев 30 август куни АCWА Power компанияси бошқаруви раиси Муҳаммад Абунайянни қабул қилди. Бу ҳақда Президент матбуот хизмати хабар берди.
Унга кўра, Саудиянинг ушбу компанияси билан амалий ҳамкорликни янада кенгайтириш ва мамлакатдаги устувор лойиҳаларни жадаллаштириш масалалари атрофлича кўриб чиқилди. Давлат раҳбари бугунги кунда Ўзбекистон энергетика тармоғини ривожлантириш ва модернизация қилишга энг кўп инвестиция киритаётган АCWА Power билан самарали шериклик даражасини қайд этди.
Замонавий иссиқлик электр станциялари, шамол ва қуёш энергетикаси объектлари, энергетика инфратузилмасини барпо этиш, “яшил” водород ишлаб чиқариш, илғор технологик ечимлар асосида ускуна ва бутловчи қисмларни маҳаллийлаштириш лойиҳаларини илгари суришга алоҳида эътибор қаратилди.
Бундан ташқари, Муҳаммад Абунайян ҳамраислик қилаётган қўшма Ишбилармонлар кенгаши доирасида Саудиянинг етакчи компания ва банк институтларини Ўзбекистонга жалб қилиш борасидаги ишларни давом эттириш муҳимлиги таъкидланди.
Учрашув якунида АCWА Power раиси унинг фаолияти юксак баҳолангани ва давлат мукофоти – “Дўстлик” ордени билан тақдирлангани учун Ўзбекистон етакчисига миннатдорлик билдирди.
Изоҳ (0)