Челябинск вилоятида Россия Федерал хавфсизлик хизматига тегишли Ми-8 вертолёти қулаб тушди. Бу ҳақда “ТАСС” хабар берди.
Вертолёт Прудний қишлоғи яқинидаги ўрмонга қулаб тушган. Самолёт бортида тўрт кишидан иборат экипаж бўлган, уларнинг барчаси ҳалок бўлган. Авиаҳалокат Ми-8 нинг ўқув парвозида содир бўлган.
“РИА Новости” хабарига кўра, ҳодисага техниканинг носозлиги сабаб бўлган. Маsh Telegram канали эса вертолёт ёмон кўриш шароитида юқори волтли линия билан туташгани, бортда уч киши — инструктор ва икки курсант бўлганини ёзмоқда.
112 Telegram канали ҳам ҳалокатга учраган Ми-8 экипажи уч кишидан иборат бўлганини хабар қилган.
Бунгача Россиянинг Тверь вилоятида 23 август куни Пригожинга тегишли самолёт қулаб тушганди. Оқибатда бортдаги ўн киши ҳалок бўлган, улар орасида “Вагнер” раҳбари ва унинг ўринбосари ҳам бор.
Изоҳ (0)