Ўзбекистон Афғонистонга протеин ва витамин комплекслари етказиб бериш бўйича келишувга эришди. Бу ҳақда Фармацевтика тармоғини ривожлантириш агентлиги хабар берди.
Маълум қилинишича, айни пайтда Ўзбекистон вазирлик ва идоралари масъулларидан иборат бир гуруҳ вакиллар Афғонистонда бўлиб турибди. Делегация таркибида Фармацевтика тармоғини ривожлантириш агентлиги бошқармаси бошлиғи Шерзод Якубов ҳам бўлиб, фармацевтика ва соғлиқни сақлаш соҳасида Афғонистон ва Ўзбекистон ўртасидаги ҳамкорлик масалаларида музокаралар олиб бормоқда.
Хусусан, Афғонистоннинг “Фючер Велс Трайдинг” компанияси директори Г.Фаҳим билан Ўзбекистондаги ишлаб чиқарувчилар томонидан йилига ўртача 1 миллион долларлик протеин ва витамин комплексларини етказиб бериш бўйича келишувларга эришилди.
Шунингдек, Афғонистон Аҳоли саломатлиги вазирлигининг фармацевтика хизматлари директори Ҳамид Фурмули билан мазкур мамлакатдаги “Ибн Сина” корхонаси негизида шартнома тузиш масалалари муҳокама қилинди.
Афғонистонда давлат томонидан аҳолини фармацевтика маҳсулотлари билан таъминлаш хусусий сектор томонидан амалга оширилади. Стоматология хизматлари кўрсатиш бўйича Кобул шаҳрида атиги битта корхона фаолият кўрсатиб келаётган бўлиб, учрашувлар давомида Афғонистон тиббиёт ходимларини Health manager бўйича малакасини ошириш, қисқа муддатли курсларда ўқитиш масалалари келишилди.
Мазкур ҳолатлар эътиборга олиниб, Ўзбекистонда ишлаб чиқарилган дори маҳсулотларини ушбу мамлакат бозорига етказиш борасида Афғонистон “Озиқ-овқат ва дори воситалари сифатини назорат қилиш” миллий уюшмаси раиси, доктор А.Умар билан самарали музокаралар олиб борилди.
Хусусан, давлат рўйхатидан ўтказишнинг ўзаро соддалаштирилган тизимини (25 кунгача) жорий қилиш бўйича келишув лойиҳаси ишлаб чиқилмоқда.
Изоҳ (0)