“Халқаро шартномани тасдиқлаш тўғрисида”ги президент қарорлари қабул қилинди. Бу ҳақда Telegram’даги “Ҳуқуқий ахборот” канали хабар берди.
Қарорлар билан Ўзбекистон ҳамда Қатар давлати ҳукуматлари ўртасида қуйидаги битимлар тасдиқланди:
- инвестицияларни ўзаро рағбатлантириш ва ҳимоя қилиш тўғрисидаги;
- даромад солиқлари бўйича икки ёқлама солиққа тортишни бартараф қилиш ҳамда солиқларни тўлашдан бош тортиш ва бўйин товлашнинг олдини олиш тўғрисидаги.
Мазкур битимлар 2023 йил 6 июнда Самарқанд шаҳрида имзоланган. Шунга кўра, тегишлича Инвестициялар, саноат ва савдо вазирлиги ҳамда Солиқ қўмитаси халқаро шартномани амалга ошириш учун масъул ваколатли органлар этиб белгиланган.
Вазирлар Маҳкамаси ҳамда тегишли вазирлик ва идораларнинг раҳбарлари ушбу халқаро шартнома кучга кирганидан кейин унинг қоидалари амалга оширилиши устидан белгиланган тартибда назоратни таъминлайди.
Эслатиб ўтамиз, июнь ойида Самарқандда Шавкат Мирзиёев ва давлат ташрифи билан Ўзбекистонга келган Қатар амири шайх Тамим ибн Ҳамад ал-Сонийнинг музокаралари бўлиб ўтганди. Музокаралар якунида савдо-иқтисодий, инвестициявий, маданий-гуманитар ва бошқа соҳалардаги ҳамкорликни ривожлантиришга қаратилган 15 та ҳужжат имзоланган.
Изоҳ (0)