Қашқадарё вилоятининг туман ва шаҳарларида мустақилликнинг 32 йиллиги муносабати билан байрам тантаналари бўлиб ўтди. Бу ҳақда хабар берган “Дарё” мухбири байрамнинг энг қизиқ ва диққатга сазовор жойларини суратга олди.
Дастлаб вилоятнинг Деҳқонобод туманида бошланган байрам кўп ўтмай Миришкор ва Муборакда, сўнгра Қарши, Чироқчи, Шаҳрисабз ҳамда Кўкдала туманларида ҳам давом этди.
Деҳқонободда “Янги ҳаёт учун, Янги Ўзбекистон учун” шиори остида бошланган байрам тадбири туман ҳокими Зоир Алиқуловнинг кириш сўзи билан бошланиб, эришилган ютуқларни маълум қилиш билан давом эттирилди. Кейин саҳнада кўриниш берган Умида Мирҳамидова туман аҳлига кўтаринки кайфият улашиб, кечага файз бағишлади.
Вилоятнинг чекка туманларидан бири Миришкорда кўриниш берган Шоҳруххон “Дўстлик” орденини қўлга киритганини миришкорликлар даврасида эшитди ва қувончини туман аҳли билан бирга баҳам кўрди. Сўнгра байрам кечасида “Аламли” таронаси билан саҳнага чиқиб келган Шоира Отабекова қашқадарёликларни байрам билан қутлади.
Ғузор туманида бўлиб ўтган Мустақиллик байрамида дастлаб туман ҳокими Бекзод Суюнов туман аҳлини байрам билан қутлаб, мазкур йилда аҳоли фаровонлиги йўлида амалга оширилган ишларни санаб ўтди. Сўнг эстрада хонандаси Сардор Бекмуродов дилкаш тароналарини куйлаб, одамларни ўйинга туширди.
Қашқадарё вилоятининг сўлим Китоб тумани марказий ўйингоҳидаги байрам тадбирида чиқиш қилган эстрада хонандаси Гулинур китобликларга юқори кайфият улашиш баробарида, барчани рақсга чорлади.
.jpg)
Вилоят маркази Қарши шаҳридаги Амфитеатрда давом этган тантаналар аввалида вилоят ҳокими Муроджон Азимов сўз олиб, президент ташаббуси билан бошланган маҳаллалар инфратузилмасини янада яхшилаш дастурига кўра, вилоятда қиймати 530 миллиард сўмлик 687 та объект фойдаланишга топширилганини билдирди. 2,5 триллион сўм маблағ ажратилиши эвазига 1700 та объектда қурилиш-таъмирлаш ишлари амалга оширилаётганини қўшимча қилди.
“Ташаббусли бюджет” ва “Менинг йўлим” лойиҳалари доирасида ички йўлларнинг таъмири учун 200 миллиардга яқин, ижтимоий соҳа объектлари учун 65 миллиард сўм ва бошқа тадбирлар учун 25 миллиард сўм маблағлар ажратилиб, ишлар юқори суръатда олиб борилмоқда. Электр таъминотини яхшилаш бўйича 324 км электр тармоқлари ва 200 дона трансформатор пунктларини қуриш ва таъмирлаш ишлари амалга оширилди, — деди вилоят раҳбари.
Ҳоким чиқишидан сўнг саҳнада Ботир Қодиров ҳамда Гулсанам Мамазоитова каби эстрада юлдузлари кўриниш бериб, қашқадарёликларга байрам кайфиятини улашди.
Изоҳ (0)