Тошкент шаҳри ва вилоятида электр энергияси ҳамда табиий газдан ноқонуний фойдаланиш ҳолатлари аниқланди. Бу ҳақда Энергетика вазирлиги матбуот хизмати хабар берди.
Қайд этилишича, “Ўзэнергоинспекция” томонидан ҳуқуқни муҳофаза қилувчи органлар ва таъминотчи корхоналар мутахассислари билан ҳамкорликда ўтказилган назорат тадбирларида Тошкент шаҳри ҳамда вилоятида электр энергияси ва табиий газдан ноқонуний фойдаланиш ҳолатлари аниқланган.
Хусусан:
- Мирзо Улуғбек туманида жойлашган тиббиёт муассасаси электр тармоғига ноқонуний улангани натижасида давлат манфаатларига 396 миллион сўм (396 минг кВт/соат);
- Зангиота тумани “Обод турмуш” МФЙда фуқаро Ф.Қ.га қарашли умумий овқатланиш шохобчаси табиий газ тармоғига ноқонуний улангани натижасида давлат манфаатларига 318 миллион 582 минг сўм (318 минг 582 метр куб) зарар етказилгани маълум бўлган.
Дастлабки ҳисоб-китобларга кўра, мазкур икки ҳолат натижасида жами 714 миллион 582 минг сўм зарар етказилган.
Маълумот учун, ушбу ҳажмдаги табиий газ ҳозирги кунда қарийб 1,6 мингта, электр энергияси эса 2 мингта хонадоннинг бир ойлик истеъмолига тенгдир.
Аниқланган ҳолатлар юзасидан ҳуқуқни муҳофаза қилувчи органлар томонидан ўрнатилган тартибда суриштирув ишлари олиб борилмоқда.
Ўзбекистонда 2023 йилнинг 6 ойида электр энергиясидан ноқонуний фойдаланиш туфайли 78,5 миллиард сўм, табиий газдан ноқонуний фойдаланиш сабабли эса 231 миллиард 866 миллион сўм зарар кўрилган. Бундан олдин Бухоро шаҳрида фаолият юритиб келаётган корхона электр ҳисоблагичга ташқи таъсир кўрсатиши натижасида тизимга 2 миллиард сўмлик зарар етказилгани тўғрисида хабар берилганди.
Изоҳ (0)