FТ: Ғарб ҳарбийлари украиналикларни ўқитишда таржимон етишмаслигидан қийналди

Германияда Украина ҳарбийларини тайёрлашда юзага келган асосий қийинчиликлардан бири — таржимонлар етишмаслиги бўлди, деб ёзади Financial Times.

“Таржимонлар – биринчи рақамли муаммо”, — деди Германия, Дания ва Нидерландия ҳарбий хизматчиларидан иборат Европа Иттифоқи ўқув миссияси раҳбари ўринбосари, нидерландиялик генерал Мартин Бонн. Унинг сўзларига кўра, кўп ҳолларда Украина томони ва Ғарб давлатлари етарли малакага эга бўлмаган таржимонларни беради.

Ҳарбий ёки техник шароитда қўлланадиган сўзларнинг таржимаси катта муаммо бўлмоқда. Чунки бундай сўзларни кундалик ҳаётда ҳеч ким ишлатмайди

Бундан ташқари, нашр таъкидлашича, ўқишга келганларнинг тайёргарлик даражаси ва ёши турлича (улардан бири, ҳатто, 70 ёшдан ошган). Украиналик қўмондонлар энг қимматли ҳарбийларни жанговар миссиялардан узоққа юбормасликни афзал кўраётган бўлиши мумкин, дейди нашр журналистлари.

Шу билан бирга, FТ суҳбатдошлари Украина ҳарбийларидаги юқори иштиёқни эътироф этди.

Йил охиригача Германияда 10 минг нафар украиналик ҳарбий хизматчи тайёргарликдан ўтиши керак. Украина Қуролли кучларини Ғарбдаги иттифоқчилар берган танклар, артиллерия ва ҳаво ҳужумидан мудофаа тизимлари билан ишлашга ўргатиш дастури доирасида жами 63 минг кишини ўқитиш режалаштирилган.