Germaniyada Ukraina harbiylarini tayyorlashda yuzaga kelgan asosiy qiyinchiliklardan biri — tarjimonlar yetishmasligi bo‘ldi, deb yozadi Financial Times.
“Tarjimonlar – birinchi raqamli muammo”, — dedi Germaniya, Daniya va Niderlandiya harbiy xizmatchilaridan iborat Yevropa Ittifoqi o‘quv missiyasi rahbari o‘rinbosari, niderlandiyalik general Martin Bonn. Uning so‘zlariga ko‘ra, ko‘p hollarda Ukraina tomoni va G‘arb davlatlari yetarli malakaga ega bo‘lmagan tarjimonlarni beradi.
Harbiy yoki texnik sharoitda qo‘llanadigan so‘zlarning tarjimasi katta muammo bo‘lmoqda. Chunki bunday so‘zlarni kundalik hayotda hech kim ishlatmaydi
Bundan tashqari, nashr taʼkidlashicha, o‘qishga kelganlarning tayyorgarlik darajasi va yoshi turlicha (ulardan biri, hatto, 70 yoshdan oshgan). Ukrainalik qo‘mondonlar eng qimmatli harbiylarni jangovar missiyalardan uzoqqa yubormaslikni afzal ko‘rayotgan bo‘lishi mumkin, deydi nashr jurnalistlari.
Shu bilan birga, FT suhbatdoshlari Ukraina harbiylaridagi yuqori ishtiyoqni e’tirof etdi.
Yil oxirigacha Germaniyada 10 ming nafar ukrainalik harbiy xizmatchi tayyorgarlikdan o‘tishi kerak. Ukraina Qurolli kuchlarini G‘arbdagi ittifoqchilar bergan tanklar, artilleriya va havo hujumidan mudofaa tizimlari bilan ishlashga o‘rgatish dasturi doirasida jami 63 ming kishini o‘qitish rejalashtirilgan.
Izoh (0)