Ҳозирги вақтда 11 мингдан ортиқ украиналик ҳарбий хизматчилар хорижда малака оширмоқда. Украина ҳимоячиларини ўқитиш “коалицияси”га 26 та давлат қўшилган. Бу ҳақда Пентагон спикери генерал Патрик Райдер маълум қилди, деб ёзмоқда CNN.
Генералнинг сўзларига кўра, 2022 йилнинг апрель ойидан бери украиналик ҳарбийлар 20 дан ортиқ жанговар тизимлар бўйича 40 дан ортиқ турли ўқув дастурларида қатнашган.
Шу билан бирга, Россиянинг кенг кўламли босқини бошланганидан бери АҚШдан келган мутахассислар етти мингдан ортиқ украиналик ҳарбий хизматчиларни ўқитган.
“Бу ҳафта Оклахома штатидаги Форт-Силл шаҳрида Патриот ҳаво мудофаа тизими билан ишлашни машқ қилган 65 нафар украиналик курсни тамомлаб, Европага қайтди”, — деди Райдер.
Шунингдек, у март ойи охирида тўрт мингдан ортиқ украиналик ҳарбий хизматчилар Германияда умумий тайёрлов машғулотларидан ўтишини, келгусида улар Bradley ва Stryker жанговар машиналарини бошқаришини таъкидлади.
“Қўшма Штатлар ушбу машғулотларни давом эттиради ва Украина халқига мамлакатни ҳимоя қилиш, Россия агрессиясини қайтариш учун зарур бўлган мудофаа ёрдамини таъминлаш учун иттифоқчилар ва ҳамкорлар билан яқиндан ишлайди. Биз Украинани қанча вақт керак бўлса, шунча қўллаб-қувватлашга аҳд қилганмиз”, — деди генерал.
Аввалроқ украиналик танкчилар гуруҳи қарши ҳужумда қўлланилиши кутилаётган Challenger 2 танклари билан ишлаш бўйича Британияда машғулотларни тугатиб ватанига қайтганди.
Изоҳ (0)