Соғлиқни сақлаш вазирлиги “Бухоро давлат тиббиёт университетини ташкил этиш ва соҳада кадрлар тайёрлаш тизимини янада такомиллаштириш тўғрисида”ги президент қарори лойиҳасини муҳокамага қўйди.
Ҳужжат билан Олий таълим, фан ва инновациялар вазирлиги, Бухоро давлат тиббиёт институтининг кузатув кенгаши, Бухоро вилояти ҳокимлиги ҳамда Навоий вилояти ҳокимлигининг Абу Али ибн Сино номидаги Бухоро давлат тиббиёт институтини Абу Али ибн Сино номидаги Бухоро давлат тиббиёт университети этиб қайта ташкил этиш тўғрисидаги таклифига розилик берилмоқда.
Шунингдек, Навоий шаҳрида жойлашган Абу Али ибн Сино номидаги Жамоат саломатлиги техникуми ҳамда Болалар-ўсмирлар футбол академияси бинолари негизида Бухоро давлат тиббиёт университети Навоий филиали ташкил этилади. Университет ҳузурида кўп тармоқли клиника ташкил этилади.
Университет ва филиалнинг асосий вазифалари, фаолият йўналишлари этиб қуйидагилар белгиланади:
- узлуксиз тиббий-касбий таълим тизимида юқори малакали тиббиёт кадрларини тайёрлаш, қайта тайёрлаш ва уларнинг малакасини ошириш;
- ўқув жараёнини амалий кўникмаларни шакллантиришга йўналтириш, халқаро таълим стандартларига асосланган илғор педагогик технологиялар, ўқув дастурлари ва инновацион ўқув-методик материалларни кенг жорий этиш;
- клиника ва ўқув базалари фаолиятида назарий билим ҳамда амалиётнинг уйғунлигини таъминлаш учун зарур шароитлар яратиш;
- фундаментал, амалий ва инновацион илмий-тадқиқот ишларини тиббиёт амалиётидаги мавжуд муаммоларнинг ечимига қаратиш, тиббий таълим, фан, инновация ва илмий тадқиқотлар натижаларининг узвий боғлиқлигини таъминлаш;
- хорижий тиббиёт олий таълим муассасалари билан ҳамкорлик доирасида талабалар, профессор-ўқитувчилар, илмий изланувчилар ташқи академик мобиллиги дастурлари ҳамда қўшма таълим дастурларини жорий этиш ва ривожлантириш.
Бундан олдин “Жисмоний тарбия ва спорт соҳаси учун тиббиёт кадрларини тайёрлаш ҳамда спортчиларга тиббий хизмат кўрсатиш тизимини янада такомиллаштириш чора-тадбирлари тўғрисида”ги президент қарори билан Тошкент тиббиёт академиясининг Чирчиқ филиали ташкил этилиши тўғрисида хабар берилганди.
Изоҳ (0)