Кремлда “Вагнер” раҳбари Евгений Пригожиннинг дафн маросими формати ва санаси ҳақида маълумот йўқ. Бу ҳақда Россия президенти матбуот котиби Дмитрий Песков хабар берди.
“Дафн маросими ҳақида ҳозирча ҳеч қандай маълумотга эга эмасман, шунинг учун сизга ҳеч нарса айта олмайман”, — деди у.
Песков бу биринчи навбатда қариндошларнинг қарорига боғлиқ бўлишини таъкидлади. Дафн маросимининг жойи ва вақти номаълум бўлгани учун президентнинг маросимда иштирок этиши ҳақидаги “саволга жавоб бўлиши мумкин эмас”, дея қўшимча қилди Песков.
23 август куни Тверь вилоятида Москвадан Санкт-Петербургга учаётган шахсий Embraer Legacy самолёти ҳалокатга учради. Самолётдаги ўн кишининг бари ҳалок бўлган. Йўловчилар қаторида “Вагнер” раҳбари Евгений Пригожин ва унинг ўринбосари Дмитрий Уткин бўлган.
Россия президенти Владимир Путин ва Чеченистон раҳбари Рамзан Қодиров унинг оиласига ҳамдардлик билдирди.
“Мен Пригожинни жуда узоқ вақтдан бери: 1990 йилларнинг бошидан бери танийман. У тақдири мураккаб, ҳаётда жиддий хатоларга йўл қўйган одам эди. Керакли натижаларга эришди. У иқтидорли инсон, иқтидорли тадбиркор эди. Нафақат мамлакатимизда балки чет элда, хусусан, Африкада ҳам фаол ишлади. У ерда нефть, газ, қимматбаҳо металлар ва тошлар билан шуғулланган”, — деган Путин.
Песков “Вагнер” раҳбарининг ўлимига Путин алоқадорлигини рад этди. Тегишли фикрни Беларусь раҳбари Александ Лукашенко ҳам илгари сурди. У Пригожин ундан хавфсизлик кафолатлари сўрамагани ва “Вагнер” Беларусда қолишини айтди.
Украина президенти Владимир Зеленский ҳам воқеага муносабат билдирди ва Украинанинг бунга алоқадорлигини рад этди. У авиаҳалокат ортида ким турганини ҳамма тушунишини айтди.
Изоҳ (0)