“Барчаси ёлғон”. Песков Пригожиннинг ўлими ортида Путин тургани ҳақидаги тахминларни рад этди

Россия президенти матбуот котиби Дмитрий Песков Ғарб давлатлари вакилларининг “Вагнер” асосчиси Евгений Пригожин Кремль буйруғи билан ўлдирилгани ҳақидаги баёнотларини рад этди. Бу ҳақда Россия президенти матбуот котиби Дмитрий Песков журналистлар билан учрашувда маълум қилди.

BBC мухбири Песковдан Пригожин самолёти ҳалокатига Кремлнинг алоқадорлиги ҳақида айтилаётган маълумотларга изоҳ беришни сўради.

Бунга жавобан Кремль вакили ушбу самолёт ҳалокати ва “самолёт йўловчиларининг, жумладан, Евгений Пригожиннинг фожиали ўлими” атрофида кўп тахминлар борлигини айтди.

“Албатта, Ғарбда бу тахминларнинг барчаси маълум бир бурчак остида тақдим этилади. Буларнинг барчаси мутлақо ёлғон”, — деди Песков.

Песковнинг сўзларига кўра, “фактларга асосланиш керак, ҳали кўп фактлар йўқ”.

“Уларга тергов ҳаракатлари давомида аниқлик киритилади”, — деди Песков.

Песков кеча, 25 август куни президент Владимир Путин Тверь яқинидаги самолёт ҳалокати ҳақида гапирганини эслади.

“Президент тергов натижаларини кутаётганини айтди, жараён яқин кунларда якунланади”, — деб қўшимча қилди Кремль матбуот котиби.

Унинг айтишича, Путин яқин орада Пригожин билан учрашмаган. 

Пригожин самолётининг ҳалокати ва Путиннинг ҳамдардлиги

23 август куни кечқурун Тверь вилоятида бизнес-жет ҳалокатга учради, ОАВ хабарларига кўра, у Евгений Пригожинга тегишли бўлган. Ҳалокатда бортдаги барча 10 киши ҳалок бўлган. Федерал ҳаво транспорти агентлиги маълумотларига кўра, йўловчилар рўйхатида “Вагнер” асосчисининг исми ҳам бор.

Пригожиннинг ўлими расман тасдиқланмаган. Бироқ Россия президенти Владимир Путин, шунингдек, бошқа россиялик сиёсатчилар (хусусан, Чеченистон раҳбари Рамзан Қодиров) унинг ўлими муносабат билан ҳамдардлик билдирди.

The New York Times, Тhе Wаll Street Journal ва бошқа нуфузли нашрлар АҚШ ва Европа расмийларининг авиаҳалокат борасидаги фикрларини чоп этди. АҚШ расмийларининг дастлабки баҳосига кўра, Пригожин ўтирган бизнес-жет бортида бомба портлаган ёки ҳалокатга бошқа турдаги саботаж сабаб бўлган. Ғарб расмийлари анонимлик шарти билан NYT’га айтишича, улар Пригожиннинг самолётни йўқ қилишга “Владимир Путин буйруқ берган”, деб ҳисоблайди.