“Абу Райҳон Беруний номидаги UNESCО — Ўзбекистон халқаро мукофотини таъсис этишни қўллаб-қувватлаш тўғрисида” президент қарори эълон қилинди. Бу ҳақда ЎзА хабар берди.
Қарорга мувофиқ, UNESCО билан ҳамкорликда Абу Райҳон Беруний номидаги UNESCО – Ўзбекистон халқаро мукофотини таъсис этиш ҳамда Париж шаҳридаги UNESCО бош қароргоҳида 2023 йил 4–8 сентябрь кунлари Абу Райҳон Беруний ҳаёти ва ижодига бағишланган халқаро кўргазма ва тадбирларни юқори савияда ўтказиш белгиланди.
Президент 2022 йилда “Буюк мутафаккир ва қомусий олим Абу Райҳон Беруний таваллудининг 1050 йиллигини халқаро миқёсда кенг нишонлаш тўғрисида”ги қарорни имзолаганди. Қарорга асосан:
- 2022–2023 йилларда Абу Райҳон Беруний таваллудининг 1050 йиллиги UNESCО шафелигида халқаро миқёсда кенг нишонланиши;
- Қорақалпоғистоннинг Беруний туманида 2023 йил якунигача Абу Райҳон Беруний мажмуаси қурилади ва унинг ҳудудида илмий-маърифий, маданий ва дам олиш ҳамда туризм объектлари фаолияти ташкил қилиниши;
- умумий ўрта таълим ташкилотлари, академик лицейлар ва касб-ҳунар мактаблари ўқувчилари ўртасида Хоразм вилоятида тегишли фан бўйича Абу Райҳон Беруний номидаги халқаро фан олимпиадаси ўтказилиши;
- Абу Райҳон Беруний номидаги халқаро мукофот таъсис этилиши;
- Беруний ҳаёти ва меросини тадқиқ этиш бўйича илмий-тадқиқот ишларига давлат буюртмаси талабларига мувофиқ илмий лойиҳалар танлови эълон қилиниши;
- Тошкент шаҳрида Абу Райҳон Беруний таваллудининг 1050 йиллигига бағишланган халқаро анжуман ўтказилиши;
- 2022–2023 йилларда Абу Райҳон Беруний ҳаёти ва илмий-маърифий фаолиятига бағишланган бадиий, мултипликацион ва тўлиқ метражли ҳужжатли фильмлар, кўп қисмли телесериал яратилади ва хорижий мамлакатларда намойиш қилиниши;
- Бадиий академия ва “Ҳунарманд” уюшмаси 2022–2023 йилларда республика бўйлаб Абу Райҳон Беруний ҳаёти ва илмий-маърифий фаолиятига бағишланган тасвирий санъат асарлари, миниатюралар, халқ амалий санъати намуналари ҳамда фотосуратлар кўргазмаларини ташкил этилиши белгиланганди.
Изоҳ (0)