Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи бўйича бошланган суд мажлиси, қисқа танаффусдан сўнг 25 август куни ўз ишини давом эттиргани, унда Фармацевтика тармоғини ривожлантириш агентлиги собиқ директорининг икки нафар собиқ ўринбосари тинглангани хабар берилганди. Бугунги суд мажлисида агентлик собиқ директорининг собиқ биринчи ўринбосари А.А. ҳам сўроқ қилинди.
Судланувчини саволга тутган адвокати М.Мадаминов ҳимояси остидаги судланувчи мазкур жиноят иши доирасида дастлаб гумонланувчи сифатида ишга жалб этилганини, сўнгра иш давомида гувоҳ сифатида ҳам сўроқ қилиниб, ўзига қарши кўрсатмалар берганини айтмоқда.
Судланувчининг адвокат саволларига жавоб беришича, у ишга айбланувчи сифатида жалб этилганидан сўнг тергов органи томонидан гувоҳ сифатида ҳам ишга жалб қилинган. Аммо унга терговчи томонидан гувоҳ тариқасида сўроқ қилинишидан аввал гувоҳ ўзига қарши кўрсатув бермаслиги ҳақида тушунтириш берилмаган.
Суд айни шу жойига келганида судланувчи тоби бўлмаётганини, саволларга жавоб беришга соғлиғи жавоб бермаслигини маълум қилгач, суд судланувчини тез тиббий ёрдам шифокорига юборди. Ишда 10 дақиқалик танаффус эълон қилинди.
Судланувчига тиббий ёрдам кўрсатилиб, иш давом этганда ҳам судланувчи яна тоби йўқлигини, саволларга жавоб беришга соғлиғи имкон бермаслигини, аммо суд давом этса, судда ўтириши мумкинлигини қўшимча қилди. Суд шундан сўнг 2023 йилнинг 6 сентябрь куни соат 10:00 га қадар танаффус эълон қилди.
Изоҳ (0)