“Ким сизга дорига заҳар қўшаётгани ҳақида хабар беради?” “Док-1 Макс” судида “ташқари”даги судланувчи “ичкари”даги судланувчини саволга тутди

Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи бўйича бошланган суд, 25 август куни ўз ишини давом эттирди. Навбатдаги суд мажлисида Фармацевтика тармоғини ривожлантириш агентлиги собиқ директорининг икки нафар собиқ ўринбосари тингланди.

Судда сўз олган собиқ ўринбосар Н.М. суд жараёнида дастлаб кўрсатмаларини айтиб, сўнгра берилган саволларга жавоб қайтарди.

Собиқ мансабдорга савол билан юзланган “ташқари”даги судланувчи Н.Ш. (Мазкур жиноят иши бўйича қамоққа олиш эҳтиёт чораси қўлланилмаган судланувчилар 14 нафар кишини, қамоққа олиш эҳтиёт чораси қўлланилган судланувчилар 7 кишини ташкил қилади - таҳририят изоҳи) “Док-1 Макс”га асал таъми қўшилган пайтда унинг гувоҳномаси муддати тугаган бўлса, гувоҳнома муддатини узайтириш ўрнига дори таркиби ўзгаргани учун унга янги гувоҳнома қилиниши лозим эмасмиди, дея савол берди.

“Дори воситасининг молекуласи ўзгармаяпти-ку”, деди бунга жавоб қилган судланувчи Н.М. “Дори воситасининг молекуласи этиленгликол қўшилганида ўзгариб бўлган”, деди саволига жавоб кутган судланувчи. Собиқ мансабдор Н.М. эса “Улар бизга этиленгликол қўшилгани ҳақида ҳеч қандай маълумот бермаган-ку”, деди. Шунда Н.Ш. “Ким сизга ишлаб чиқараётган дорисига заҳар қўшилгани ҳақида хабар беради”, дея қўшимча савол берди. Масъул бунга “Бу — заҳар эмас, ёт модда. Асал дори воситасининг таркибига таъсир қиладими?”, деди. Савол берувчи судланувчи эса “Албатта, боиси асал кимгадир аллергия бериши ҳам мумкин”, деб жавоб қилди.

Эслатиб ўтамиз, Соғлиқни сақлаш вазирлиги ҳузуридаги Республика суд тиббий экспертизаси илмий-амалий маркази ва унинг ҳудудий филиаллари хулосаларига кўра, “Док-1 Макс” ва “Амбронол” (сироп) дори воситаларини истеъмол қилган 65 нафар бола ўлимига мазкур дори воситалари таркибидаги этиленгликол ва диэтиленгликол ёт моддаларидан заҳарланиш сабаб бўлган. Доридан заҳарланган болаларда ўткир буйрак етишмовчилиги, полиорган етишмовчилиги келиб чиққан.

Суднинг дастлабки мажлисларида сўз олган судланувчиларнинг қайд этилишича, “Док-1 Макс” сиропи Ўзбекистонга дастлаб 2012 йил олиб кирилган. 2021 йил 22-октябрь куни “Док-1 Макс" сиропини рўйхатдан ўтказилганлик гувоҳномасининг муддатини узайтириш учун Давлат марказига ариза топширилган. Ҳужжатларда сиропни ишлаб чиқарувчи Marion Biotech Pvt.Ltd компаниясининг GMP сертификати муддати 2021 йил 24-октябрь куни тугаши кўрсатилган бўлган.