Fuqaro jinoyat ishiga ayblanuvchi tariqasida jalb etilgach, guvoh sifatida so‘roq qilinishi mumkin emas: “Dok-1 Maks” ishidagi sudda advokat tergov organi xato qilganini aytmoqda

O‘zbekistonda 65 nafar bolaning o‘limiga sababchi deya qaralayotgan “Dok-1 Maks” siropi bo‘yicha boshlangan sud majlisi, qisqa tanaffusdan so‘ng 25-avgust kuni o‘z ishini davom ettirgani, unda Farmatsevtika tarmog‘ini rivojlantirish agentligi sobiq direktorining ikki nafar sobiq o‘rinbosari tinglangani xabar berilgandi. Bugungi sud majlisida agentlik sobiq direktorining sobiq birinchi o‘rinbosari A.A. ham so‘roq qilindi.

Sudlanuvchini savolga tutgan advokati M.Madaminov himoyasi ostidagi sudlanuvchi mazkur jinoyat ishi doirasida dastlab gumonlanuvchi sifatida ishga jalb etilganini, so‘ngra ish davomida guvoh sifatida ham so‘roq qilinib, o‘ziga qarshi ko‘rsatmalar berganini aytmoqda.

Sudlanuvchining advokat savollariga javob berishicha, u ishga ayblanuvchi sifatida jalb etilganidan so‘ng tergov organi tomonidan guvoh sifatida ham ishga jalb qilingan. Ammo unga tergovchi tomonidan guvoh tariqasida so‘roq qilinishidan avval guvoh o‘ziga qarshi ko‘rsatuv bermasligi haqida tushuntirish berilmagan.

Sud ayni shu joyiga kelganida sudlanuvchi tobi bo‘lmayotganini, savollarga javob berishga sog‘lig‘i javob bermasligini maʼlum qilgach, sud sudlanuvchini tez tibbiy yordam shifokoriga yubordi. Ishda 10 daqiqalik tanaffus eʼlon qilindi.

Sudlanuvchiga tibbiy yordam ko‘rsatilib, ish davom etganda ham sudlanuvchi yana tobi yo‘qligini, savollarga javob berishga sog‘lig‘i imkon bermasligini, ammo sud davom etsa, sudda o‘tirishi mumkinligini qo‘shimcha qildi. Sud shundan so‘ng 2023-yilning 6-sentabr kuni soat 10:00 ga qadar tanaffus eʼlon qildi.