Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи бўйича суд иши бошлангани, судда адвокатлар ОАВ фаолиятига қаршилик кўрсатгани-ю, “Kun.uz” ҳамда “Qalampir.uz” сайтларини суд жараёнини ёритишда айбсизлик презумпсиясига амал қилмаганликда, “Gazeta.uz” нашрини эса жонли эфир қилиб, суд жараёнидаги катта сирларни фош қилишда айбдор қилишга уринишгани хабар берилганди. Навбатдаги суд мажлисида Фармацевтика тармоғини ривожлантириш агентлиги собиқ раҳбари С.К. сўз олиб, “Док-1 Макс” сиропи дастлаб 14 нафар бола ўлимига сабабчи бўлгани ойдинлашгач, сиропдан сичқонларга ҳам берилгани ва дорининг заҳарлилик даражаси шу йўсинда текширилганини очиқланди.
2022 йилнинг декабрь ойи эди, мен ўшанда хизмат сафари билан Қозоғистоннинг Чимкент шаҳрида эдим. Telegram’имга Соғлиқни сақлаш вазирлигининг бўлим бошлиғидан хабар келди. Унда Самарқанд шаҳридаги болалар ўлими билан боғлиқ воқеа ҳақида хабар берилган экан. Хабарни олишим билан ўзим сафарда бўлганим боис А.А. исмли биринчи ўринбосаримга ташладим. Самарқанд шаҳридаги филиалимиз ходимлари болалар ўлими кузатилаётгани айтилган шифохона атрофидаги барча дорихонлардан сиропни йиғиштириб олиб, Тошкент шаҳридаги лабораториямизга олиб келишлари кераклигини айтдим.
Ҳеч ким уйига кетмасин шу ҳолат бўйича ишлаб, таҳлилини менга етказинг, дедим. Орадан тўрт-беш соат ўтгач, таҳлил натижаларини беришди. Норматив ҳужжат бўйича “Док-1 Макс” сиропида ҳеч қандай муаммо йўқ дейилди. Дорихоналарни кўздан кечира бошладик. Барча аптекалардаги сироплар қайтариб олинди.
“Док-1 Макс”да ҳеч қандай муаммо йўқ дейишгач, бир томондан хурсанд бўлдим. Яна бир томондан эса бирор муаммо бордирки, заҳарланиш кузатилди, балки нотўғри қўлланиш бордир, балки бошқа дори билан бир вақтда ичилгани сабаб реакция бергандир, деган хулосада бу сиропни ҳайвонларга ичириб, текширув ўтказтирдим. Лекин бу сироп ичирилган сичқонлар ҳам ўлди ва сиропда заҳар бор деган хулосага келинди”, — дейди судланувчи.
Собиқ масъулнинг маълум қилишича, “Док-1 Макс” билан боғлиқ воқеалар содир бўлгач, у Ҳиндистондаги касбдоши билан суҳбатлашиб, воқеа ҳақида билдирган. Шунингдек, ходимлари орқали Ўзбекистондаги дорихоналарда сотилаётган “Док-1 Макс” сиропини сотувдан қайтариб олган.
Воқеа содир бўлган кундан бошлаб, икки кунда ходимларимиз орқали Ўзбекистондаги дорихоналарда сотилаётган шу сиропни йиғиштириб олдик. Қолаверса, Ҳиндистон Соғлиқни сақлаш вазирлигидаги ҳамкасбим, дориларга жавобгар масъулга расмий хат юбориб, “Док-1 Макс” сиропини ишлаб чиқарувчиларнинг сиропи билан боғлиқ муаммо ҳақида билдирдим, — дейди С.К.
Судланувчининг қўшимча қилишича, текширув натижасида сиропда заҳарли модда кўплиги маълум бўлган.
Шу сироп бўйича ҳайвонларда ҳам текширув ўтказиб, вазиятни аниқлаштиришлари кераклиги ҳақида ходимларимга қонуний топшириқ бергандим. Ўшанда бу сироп сичқонларга ҳам ичирилганида уларда ҳам ўлим ҳолати кузатилган, — дейди собиқ раҳбар.
Изоҳ (0)