Трамп АҚШ тарихида маҳбус сифатида суратга туширилган биринчи президент бўлди (фото)

Дональд Трамп АҚШ президентлари орасида маҳбус сифатида суратга туширилган биринчи шахс бўлди, деб ёзмоқда Fox News.

Трамп 24 август куни кечқурун полицияга таслим бўлди. Унинг ўзи Жоржия штатининг Атланта шаҳридаги Фултон округи қамоқхонасига келди. Фултон округи шериф идорасида тарихий сурат олинди — бу АҚШ президенти бўлган шахснинг қамоқхонадаги биринчи сурати (

Трамп журналистларга Жоржия расмийлари унинг суратга тушишини талаб қилганини айтди.

“Бу жуда ноқулай ҳис, айниқса сиз ҳеч қандай ёмон иш қилмаган бўлсангиз”, — дея қўшимча қилди собиқ президент.

У 2020 йилда Жоржияда бўлиб ўтган сайлов натижаларига аралашув айби билан қамоққа келганини айтди.

“Буларнинг барчаси Вашингтон, Адлия вазирлиги ва фирибгар Жо Байден орқали содир бўлмоқда. Мамлакатимизда илгари бунақа нарса бўлмаган”, — деди Дональд Трамп.

У Қўшма Штатларни “учинчи дунё давлати” деб атади ва ҳозир “ишлар аввалгидан ҳам ёмонроқ” эканини таъкидлади. Трамп 20 дақиқа ҳибсда бўлганидан кейин қўйиб юборилди. Аввалроқ унинг адвокатлари суд билан собиқ президентни 200 минг доллар гаров эвазига озод қилишга келишиб олганди. Трамп қамоқхонага расмиятчилик юзасидан келган.

Ҳибсдан чиқарилганидан кейин Трамп 2021 йилдан бери биринчи марта Twitter (Х) ижтимоий тармоғидаги саҳифасига пост қўйди. У постга ўзининг магшотини жойлади.

Қамоқхонада Трампнинг суратидан ташқари бармоқ излари ҳам олинган, унга тегишли маълумотлар киритилган. Баённомада Трампнинг бўйи 1,9 метр, вазни 97,5 килограммлиги шунингдек, собиқ президентнинг сочлари сариқ, кўзлари кўк экани қайд этилган.

Август ойи ўрталарида Дональд Трампга 25 август куни Фултон округи қамоқхонасига ихтиёрий таслим бўлиш буюрилган эди. Фултон шерифи Пат Лабат Трампга бошқа маҳбуслар каби муносабатда бўлишини айтиб, полиция уни суратга олиши ҳақида огоҳлантирган.

Сайловга аралашиш иши Трампга қарши очилган тўртинчи жиноий ишдир. Бунгача у бизнес ҳужжатларини сохталаштириш, махфий ҳужжатларни ноқонуний сақлаш ва сайловда мағлуб бўлганидан кейин ҳокимиятни ноқонуний сақлаб қолишга уринишда айбланган эди.