Бортида “Вагнер” асосчиси Евгений Пригожин бўлгани айтилаётган самолёт Пригожиннинг ҳаётига суиқасд оқибатида ҳалокатга учраган, деб ёзмоқда Тhе Wаll Street Journal америкалик расмийларга таяниб. АҚШ расмийларининг дастлабки баҳосига кўра, Пригожин ўтирган бизнес-жет бортида бомба портлаган ёки ҳалокатга бошқа турдаги саботаж сабаб бўлган.
The New York Times Америка ва Ғарб расмийларига таяниб ёзишича, фалокатнинг асосий версияси — портлаш. Уларнинг сўзларига кўра, портлашга бортга ўрнатилган бомба ёки бошқа портловчи мослама сабаб бўлган бўлиши мумкин, аммо бошқа версиялар, масалан, қалбаки ёнилғи қуйилгани ҳам кўриб чиқилмоқда. АҚШ разведка ҳамжамияти самолёт ҳалокатига нима сабаб бўлганини аниқлашнинг дастлабки босқичида, деб таъкидлади CNN.
АҚШнинг разведкачи сунъий йўлдошлари ҳалокат жойи яқинида ракета учирилгани белгисини топмади, бизнес-жетнинг “ер-ҳаво” синфидаги ракета билан урилганига ҳам далиллар йўқ. Бу ҳақда NYT ва WSJ ўз манбаларига таяниб ёзади. Шу билан бирга, Reuters манбалари АҚШ расмийларининг дастлабки маълумотларига кўра, самолёт “ер-ҳаво” ракетаси билан уриб туширилганини айтган. Бундай версияни Financial Times газетасига Ғарбнинг аноним расмийси ҳам айтган. Аввалроқ “Вагнер”га алоқадор Grey Zone Telegram канали самолёт ракета билан уриб туширилганини даъво қилганди. Ҳарбий экспертлар ҳам версиялардан бири сифатида ракета зарбасини келтирди.
CNN телекомпанияси бизнес-жет қулаган жойнинг радар тасвирини чоп этди. Унга асосланиб, журналистлар самолёт ерга қулаганда унинг корпуси деярли бутун бўлган, деган хулосага келди.
АҚШ ва Европа расмийлари анонимлик шарти билан NYT га айтишича, улар Пригожиннинг самолётни йўқ қилишга “Владимир Путин буйруқ берган”, деб ҳисоблайди. Газета Ғарб разведкасининг юқори мартабали мулозимига таяниб, “кўплаб белгилар” Пригожин ҳалокатга учраган самолёт бортида бўлганини тасдиқлаши ҳақида ёзди. Америкалик манбаларнинг айтишича, АҚШ разведкаси Пригожиннинг ўлимини тасдиқламаган, бироқ бир қанча расмийлар Пригожин ҳалок бўлганини айтган.
“Пригожин вафот этган бўлиши мумкин”, — деди АҚШ Мудофаа вазирлиги матбуот котиби Патрик Райдер. “Вагнер” унинг ўлимини расман тасдиқламади.
Россия Тергов қўмитаси ҳозирча теракт бўйича иш қўзғатиш учун асослар йўқлигини билдирди – тергов парвоз хавфсизлиги қоидаларини бузиш моддаси бўйича олиб борилмоқда. Shot Telegram-каналига кўра, тергов самолётнинг қўниш қисмида портловчи қурилма бўлгани версиясини кўриб чиқмоқда. Маш маълумотларига кўра, “ўқ-дориларга эҳтиётсизлик билан муносабатда бўлганлик” ҳам ҳалокат версияларидан бири сифатида қаралмоқда: ҳалокат жойида ўқ-дорилар ва гранаталар топилган. Шу билан бирга, “Московский комсомолец” газетасининг хабар беришича, учишдан аввалроқ самолёт бизнес-жетидаги турбо-музлаткич бузилгани сабабли бир ойга таъмирлашга юборилган — таъмирлаш пайтида самолёт Шереметевода очиқ осмон остида турган.
Изоҳ (0)