Жанубий Африка Республикасидаги саммитдан сўнг BRICS’га беш давлат – Аргентина, Эрон, Саудия Арабистони, Миср ва Бирлашган Араб Амирликлари қўшилиши режалаштирилган. Бу ҳақда Бразилиянинг UOL нашри саммит якуний ҳужжати лойиҳасига таяниб хабар бермоқда.
UOL маълумотларига кўра, BRICS’га қабул қилинадиган давлатлар географик асосда танланган. Бундан ташқари, Аргентина ва Саудия Арабистонининг G20 аъзоси экани ҳам ҳисобга олинган.
Кейинроқ ЖАР президенти Сирил Рамафоса юқоридаги беш давлатдан ташқари Эфиопия ҳам ташкилотга таклиф қилинишини айтди:
“Биз BRICS’га Аргентина, Миср, Эфиопия, Эрон, Саудия Арабистони ва БААни расман таклиф этишга қарор қилдик. Уларнинг аъзолиги 2024 йил 1 июлдан бошланади”.
Айни пайтда BRICS бешта давлатдан — Бразилия, Россия, Ҳиндистон, Хитой ва ЖАРдан иборат. BRICS’га аъзолик учун 23 давлат томонидан аризалар берилган.
Охирги марта BRICS 2010 йилда кенгайди — ўшанда унга ЖАР қўшилди.
22—24 август кунлари Йоханнесбургда BRICS саммити бўлиб ўтмоқда. Унда Хитой, Ҳиндистон, Бразилия ва Жанубий Африка давлатлари раҳбарлари иштирок этмоқда. Россия томонидан ташқи ишлар вазири Сергей Лавров келган. Россия президенти Владимир Путин саммитда видеоконференция орқали иштирок этишини маълум қилган.
Аввал BRICS саммити қўриқчилари янглишиб Си Цзиньпиннинг ёрдамчисини қўлга олгани ҳақида хабар берилганди.
Изоҳ (0)